Prezıdent «Kásiptik biliktilik týraly» Zańǵa qol qoıdy

ASTANA. QazAqparat – Memleket basshysy «Kásiptik biliktilik týraly» Qazaqstan Respýblıkasynyń Zańyna qol qoıdy, dep habarlaıdy QazAqparat Aqordaǵa silteme jasap.

Sondaı-aq, Memleket basshysy «Qazaqstan Respýblıkasynyń keıbir zańnamalyq aktilerine kásiptik biliktilik, memlekettik nagradalar, áleýmettik qamsyzdandyrý jáne bilim berý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.

Zańdar mátini baspasózde jarııalanady.

Aıta ketsek, 14 maýsym kúni Májilistiń jalpy otyrysynda «Kásiptik biliktilik týraly» Zań men ilispe qujat ekinshi oqylymda qaralyp, qabyldanǵan bolatyn.

«Kásiptik biliktilik týraly» Zań jobasynyń negizgi maqsaty – azamattardyń kásiptik dárejesin taný tártibimen baılanysty qoǵamdyq qatynastardy keshendi retteýdiń tıimdi quqyqtyq negizin qalyptastyrý. Zań jobasynda kásiptik deńgeıin taný arqyly eńbek naryǵyn retteý tetikterin júıege keltirýge baǵyttalǵan Ulttyq biliktilik júıesi alǵash ret engizilmek. Kásiptik biliktilikti júzege asyratyn salalyq memlekettik organdar, salalyq keńester jáne ýákiletti organ Eńbek jáne halyqty áleýmettik qorǵaý mınıstrliginiń kelisimimen kásiptik standarttardy bekitedi. Azamattardyń kásiptik deńgeıin taný úshin olardyń quzyretterin rastaıtyn sertıfıkattar berýdi Biliktilikti taný ortalyqtary júzege asyrady», - degen edi Májilis depýtaty Juldyz Súleımenova.