Prezıdent Qasym-Jomart Toqaev Quryltaı saılaýynda daýys berdi
ASTANA. KAZINFORM — Memleket basshysy Qasym-Jomart Toqaev Táýelsizdik saraıynda ornalasqan №520 saılaý ýchaskesinde alǵashqy Quryltaı depýtattaryn saılaýǵa daýys berdi.
Tarıhı Quryltaı saılaýynda 145 depýtattyq mandatqa «Ádilet», JSDP, «Baıtaq», QHP, «Aýyl» partııasy, «Aq jol» jáne Respublica — barlyǵy 7 partııadan 545 kandıdat tirkelgen.
Prezıdent barsha kelýshilerdi quttyqtady jáne shyn máninde búgin – elimiz úshin tarıhı kún ekenin atap ótti.
– Tuńǵysh ret bir palataly Quryltaı saılaýyn ótkizip otyrmyz. Bul – mańyzdy tarıhı oqıǵa. Biz birtutas el bolyp, aýqymdy reformalar júrgizip jatyrmyz. Muny bárińiz bilesizder, kýá bolyp otyrsyzdar. Oıdaǵydaı nátıjelerge qol jetkizdik. Degenmen aldymyzda turǵan jumys aýqymdy, maqsatymyz mańyzdy dep aıtýǵa bolady. Búgingi saılaý – osy jumystyń bastaýy ǵana, – dedi Qasym-Jomart Toqaev.
Prezıdent daýys bergen soń otandyq jáne sheteldik buqaralyq aqparat quraldarynyń ókilderine brıfıng ótkizdi.
Aıta keteıik, búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Sonymen birge, 79 saılaý ýchaskesi Qazaqstannyń 61 shet memlekettegi dıplomatııalyq ókildikteri janynan ashylǵan. Olardyń ishinde Japonııa men Ońtústik Koreıadaǵy saılaý ýchaskesi Astana ýaqytymen saǵat 03:00-de jumysyn bastap ketti.
Eń sońǵy bolyp AQSh-tyń San-Frantsısko qalasyndaǵy elimizdiń Bas konsýldyǵy janynda ashylǵan saılaý ýchaskesi Astana ýaqytymen 19:00-de ashylady.
Quryltaı saılaýyna qatysty barlyq jańalyqpen myna siltemege ótip oqı alasyzdar.
