Prezıdent Qasym-Jomart Toqaev, Korol Fılıpp jáne Patshaıym Matılda Rektorlar forýmyna qatysty
ASTANA. KAZINFORM - Alem.ai. halyqaralyq ortalyǵynda Qazaqstan men Belgııa joǵary oqý oryndary jetekshileri bas qosqan is-shara ótti, dep habarlaıdy Aqordanyń baspasóz qyzmeti.
«Bilim berý men ǵylymı zertteýlerge jasandy ıntellektiniń áseri» taqyrybyn arqaý etken jıyn ınteraktıvti pikirtalas formatynda uıymdastyryldy.
Pikirtalasqa qatysýshylar jasandy ıntellekt tehnologııalary joǵary bilim men zamanaýı ǵylym salasyna qandaı ózgeris ákeletinin egjeı-tegjeıli talqylady.
Atap aıtqanda, Qazaqstannyń Eýropa men Azııa arasyndaǵy aımaqtyq hab, sondaı-aq bilim berý, zertteýler jáne ınnovatsııalar baǵytyndaǵy yntymaqtastyqqa arnalǵan strategııalyq alań retindegi róli qarastyryldy.
Akademııalyq, sondaı-aq bilim berý ortasynda jasandy ıntellekt pen oqý mashınasyn paıdalanýǵa, oqý jáne oqytý úderisterindegi jańa tehnologııanyń yqpalyna basa nazar aýdaryldy.
Forým aıasynda Qazaqstan men Belgııa joǵary oqý oryndary seriktestigin keńeıtý, birlesken bilim berý ári zertteý bastamalaryn iske qosý, akademııalyq utqyrlyqty damytý jáne joǵary mekteptegi tsıfrlyq transformatsııa salalarynda tájirıbe almasý máseleleri pysyqtaldy.
Іs-shara qorytyndysy boıynsha eki el ýnıversıtetteri arasynda birqatar kelisim men memorandýmǵa qol qoıyldy.
