Prezıdent Qasym-Jomart Toqaev Koreıanyń birqatar azamatyn marapattady
ASTANA. KAZINFORM – Seýlde Koreıa Respýblıkasynyń memleket jáne qoǵam qaıratkerlerine II dárejeli «Dostyq» ordeni saltanatty túrde tabystaldy.
Memleket basshysy búgingi mán-mańyzy erekshe rásimge jınalǵan qaýymǵa iltıpat bildirip, qazaq pen koreı ejelden dostas halyqtar ekenine nazar aýdardy.
– Eki eldiń arasy alshaq bolǵanymen, bizdi ózara qurmet pen ortaq múdde jaqyndastardy. Koreıa ekonomıkasy aınalasyndaǵy básekelestik pen syn-qaterlerge qaramastan oıdaǵydaı damýda. Bul – halyqtyń eńbekqorlyǵy men iri kásipkerlerdiń arqasy. Qazaq halqy men bılik ókilderi dostas Koreıa eline shynaıy syılastyqpen qaraıdy. Koreıa Respýblıkasy – Qazaqstannyń strategııalyq seriktesi. Biz Koreıany halyqaralyq abyroı-bedeli zor memleket retinde bilemiz. Búginde memleketterimizdiń san qyrly yntymaqtastyǵy jyl sanap nyǵaıyp keledi. Osydan bes jyl buryn Keńeıtilgen strategııalyq seriktestik týraly málimdeme qabyldaǵan edik, – dedi Qasym-Jomart Toqaev.
Prezıdent eki memleket arasynda tereń saıası dıalog ornap, san qyrly yntymaqtastyq nyǵaıǵanyn atap ótti.
– Saýda-ekonomıkalyq qarym-qatynas qarqyndy damyp kele jatyr. Biz mashına jasaý, energetıka, metallýrgııa, ozyq tehnologııa jáne basqa da salada birqatar iri jobany júzege asyryp jatyrmyz. Álemge tanymal koreı kompanııalary elimizde tabysty jumys isteýde. Mádenı-gýmanıtarlyq baılanysymyz da kúsheıdi, – dedi Memleket basshysy.
Qasym-Jomart Toqaev Koreıamen baılanysty kúsheıtýde elimizdegi koreı ultynyń ókilderi erekshe ról atqaratynyn aıtty
– Qazir Qazaqstanda júz myńnan astam koreı ultynyń ókilderi turady. Olardyń elimizdiń ekonomıkasy men qoǵamdyq-saıası damýyna qosqan úlesi orasan zor. Elimizde barlyq etnostar úshin qolaıly jaǵdaı jasalǵan. Kore-saram qaýymdastyǵy da qazaq jerinde tatý-tátti ómir súrip, elimizdiń yntymaq-birligin arttyrýǵa mol úles qosyp otyr. Qazaqstanda Koreı mádenı ortalyqtary qyzmet etedi. Almatydaǵy akademııalyq koreı teatry kórermenniń kózaıymyna aınaldy. Sondaı-aq koreı tilinde gazet shyǵady, arnaıy radıohabar taratylady, – dedi Memleket basshysy.
Prezıdenttiń paıymdaýynsha, qos halyqtyń dostyǵyn bekemdeý ortaq múddege saı keledi.
– Búgin qazaq-koreı qarym-qatynasy úshin mańyzdy kún dep sanaımyn. Men osy saparymnyń aıasynda Koreıa Respýblıkasynyń birqatar kórnekti memleket jáne qoǵam qaıratkerin ІІ dárejeli «Dostyq» ordenimen marapattaý týraly sheshim qabyldadym. Bul – qazaq jurtynyń ózderińizge degen shynaıy qurmeti, rııasyz kóńiliniń belgisi. Sizder aldaǵy ýaqytta da eki el arasyndaǵy baılanysty nyǵaıtýǵa súbeli úles qosa beresizder dep senemin, – dedi Qasym-Jomart Toqaev.
Rásim barysynda Koreıa Respýblıkasy Ulttyq jınalysynyń 22-shaqyrylym depýtattary Men Son Gıý men Lı Chje-kan, Seýl kıberýnıversıtetiniń prezıdenti Lı San Gıýn, Hangýk shet tilderi ýnıversıtetiniń (HUFS) professory, Ortalyq Azııany zertteý ınstıtýtynyń dırektory Son En Hýn, Hyundae General Hospital kópbeıindi klınıkasynyń dırektory Kım Bý Sop II dárejeli «Dostyq» ordenimen marapattaldy.
Aıta keteıik, buǵan deıin Qasym-Jomart Toqaevtyń Koreıa Respýblıkasyna memlekettik saparmen barǵany habarlandy.
