Prezıdent Qasym-Jomart Toqaev Iordanııa Korolimen kelissóz júrgizdi
ASTANA. KAZINFORM – Prezıdent Qasym-Jomart Toqaev Iordanııa Koroli II Abdalla ben ál-Hýseınmen kelissóz júrgizdi. Bul týraly Aqordanyń baspasóz qyzmeti habarlady.
Prezıdent eń aldymen, Korol II Abdallanyń bılik basyna kelgenine shırek ǵasyr tolýymen quttyqtap, onyń Iordanııa halqynyń ósip-órkendeýine jáne eldiń ornyqty damýyn qamtamasyz etý men halyqaralyq arenadaǵy abyroı-bedelin arttyrýǵa baǵyttalǵan jasampaz bastamalarynyń sátti júzege asyrylýyna tilektestik bildirdi.
Qasym-Jomart Toqaev eki el arasyndaǵy dostyq pen yntymaqtastyqty nyǵaıtýǵa úles qosyp kele jatqany úshin Iordanııa kóshbasshysyna alǵys aıtty. Prezıdenttiń pikirinshe, Iordanııa – beıbitshilik pen turaqtylyqty saqtaýǵa beıil el retinde halyqaralyq qoǵamdastyq tarapynan moıyndalǵan memleket.
– Bul saparymnyń maqsaty – bizdiń qarym-qatynastarymyzǵa, dostyǵymyz ben saýda-ekonomıkalyq baılanystarymyzǵa tyń serpin berý. Álemde oryn alyp jatqan úderisterge qatysty kózqarasymyz ben oǵan beretin baǵamyz ortaq dep sanaımyn. Sonymen qatar biz saıası deńgeıdegi yntymaqtastyǵymyzdy tereńdete túsýge nıettimiz. Bizdiń aıqyn josparymyz bar. Taıaý bolashaqta naqty ýaǵdalastyqtarǵa qol jetkizip, onyń oń nátıjelerin kóretinimizge senimdimin. Biz ózara yqpaldastyǵymyzdyń aıasynda aıanbaı jumys isteýge daıynbyz. Iordanııany dostas memleket dep sanaımyz. Eki eldi baılanystyratyn dúnıe kóp, – dedi Qasym-Jomart Toqaev.
Memleket basshysynyń aıtýynsha, búgin qabyldanatyn Birlesken málimdeme men kelisimder Qazaqstan-Iordanııa yntymaqtastyǵyn ekijaqty jáne kópjaqty kún tártibiniń barlyq baǵyty boıynsha arttyrýǵa qos tarap ta múddeli ekenin bildiredi.
Iordanııa Koroli II Abdalla Qazaqstan Prezıdenti Qasym-Jomart Toqaevtyń sapary eki el arasyndaǵy saıası, saýda-ekonomıkalyq, ınvestıtsııalyq baılanystardy odan ári keńeıtýge mol múmkindik beretinin atap ótti.
– Ózińizdi jáne Sizdiń qurmetti delegatsııańyzdy Iordanııada qarsy alǵanyma qýanyshtymyn. Búgin ekonomıkalyq baılanystardy jandandyrýǵa jáne jeke sektor úshin mol múmkindikter ashylady. Bul óte mańyzdy, – dedi Iordanııa Koroli.
Kelissóz barysynda taraptar saýda, ınvestıtsııa, ónerkásip, aýyl sharýashylyǵy, kólik-logıstıka, týrızm, energetıka, tsıfrlandyrý jáne farmatsevtıka sekildi negizgi sektorlardaǵy ózara tıimdi yntymaqtastyqtyń perspektıvasyn egjeı-tegjeıli talqylady.
Eki eldiń mádenı-gýmanıtarlyq yqpaldastyǵyn keńeıtý máselelerine aıryqsha mán berildi. Qazirgi kezde Qazaqstannyń medıtsınalyq oqý oryndarynda Iordanııanyń 300-ge jýyq azamaty bilim alyp jatyr. Sonymen qatar Memleket basshysy men Iordanııa Koroli halyqaralyq jáne óńirlik qaýipsizdiktiń ózekti máseleleri jóninde pikir almasty.
Kezdesý sońynda Prezıdent Iordanııa Korolin Qazaqstanǵa saparmen kelýge shaqyrdy.
Aıta keteıik, Prezıdent Iordan Hashımıt Koroldigine resmı saparmen bardy.
Qazaqstan Prezıdentin Korol II Abdalla ben ál-Hýseın men Taq murageri Ál-Hýseın qarsy aldy.