Qasym-Jomart Toqaev Elena Rybakınamen kezdesti
ASTANA. KAZINFORM - Memleket basshysy Qasym-Jomart Toqaev Elena Rybakınany AQSh ashyq chempıonatyndaǵy jarqyn jeńisimen jáne tennısten «álemniń birinshi raketkasy» mártebesine ıe bolýymen quttyqtady, dep habarlaıdy Aqordanyń baspasóz qyzmeti.
Prezıdent tarıhı máni zor osynaý tabys otandyq sporttyń damýyna ólsheýsiz úles qosqanyn atap ótti.
– Sizdiń jeńisterińizden keıin balalardyń tennıske qyzyǵýshylyǵy artyp, sektsııalarǵa kóptep jazylady. Olar da chempıon bolǵysy keledi. Jas órenderge ónege kórsetip otyrsyz. Bul – óte oń úrdis. Óskeleń urpaqty sportqa baýlý kerek, óıtkeni bul olardyń keleshegi úshin óte mańyzdy. Úsh birdeı Úlken dýlyǵa týrnırindegi jeńisińiz tennıs jylnamasyna óshpesteı bolyp jazyldy. Munymen toqtamaı, alda áli talaı asýdy baǵyndyrasyz dep senemin, – dedi Memleket basshysy.
Prezıdent Elena Rybakınanyń adamı qasıetterine aıryqsha toqtaldy.
– Siz kortta da, jurtshylyq ortasynda da baıyptylyǵyńyzdy baıqatasyz. Іshki mádenıetińiz joǵary ekenin únemi aıtyp júremin. Qazaqstandy sportqa, ásirese, tennıske qoldaý kórsetetin órkenıetti ári damyǵan memleket retinde tanytý turǵysynan munyń mańyzy óte zor, – dedi Qasym-Jomart Toqaev.
Elena Rybakına Memleket basshysyna ózin udaıy qoldaǵany, sondaı-aq Qazaqstanda úlken tennıstiń damýyna aıryqsha qamqorlyq kórsetkeni úshin shynaıy rızashylyǵyn bildirdi. Álemniń birinshi raketkasy Qazaqstan atynan óner kórsetýdi maqtan tutatynyn málimdedi. Tennısshi aldaǵy ýaqytta da joǵary nátıjege qol jetkizip, jankúıerlerin jańa jeńistermen qýanta berýge nıetti.
Aıta keteıik, Elena Rybakına álemniń birinshi raketkasy atanǵany týraly jazdyq.
