Qasym-Jomart Toqaev bir top qoǵam qaıratkerin memlekettik nagradalarmen marapattady
ASTANA. KAZINFORM - Memleket basshysy Aqorda tórinde ómir joly óskeleń urpaqqa úlgi-ónege bolatyn, ult múddesi úshin qajyrly qyzmet etip, halyqtyń yqylasyna bólenip kele jatqan bir top azamatqa qurmet kórsetti, dep habarlaıdy Aqordanyń baspasóz qyzmeti.
Atap aıtqanda, kórnekti sýretshi, tanymal óner qaıratkeri Bátıma Záýirbekovaǵa «Otan» ordeni, kórnekti ádebıettanýshy ǵalym Tursyn Jurtbaıǵa I dárejeli «Barys» ordeni, memleket qaıratkeri Aleksandr Sýdınge II dárejeli «Barys» ordeni tabystaldy. Belgili akter, kórnekti teatr rejısseri Nurqanat Jaqypbaıǵa «Qazaqstannyń halyq ártisi» ataǵy, aýyl sharýashylyǵy salasynyń ardageri Vıktor Hılnıchenkoǵa «Qazaqstannyń eńbek sińirgen qaıratkeri» qurmetti ataǵy berildi.
Qasym-Jomart Toqaev marapat ıelerin quttyqtap, árqaısysynyń el úshin sińirgen eńbegine jeke-jeke toqtaldy.
Prezıdent ulttyq mádenıetimizdi damytý jolynda kóp eńbek etip, beıneleý ónerinde qaıtalanbas qoltańbasymen erekshelengen Bátıma Záýirbekova otandyq gobelen óneri mektebiniń negizin qalap, qazaq áıelderi arasynan shyqqan osy saladaǵy tuńǵysh kásibı maman atanǵanyna nazar aýdardy.
– Shyǵarmashylyǵyńyz joǵary deńgeıde moıyndalyp, Memlekettik syılyqtyń ıegeri boldyńyz. Halqymyzdyń tarıhyn, bitim-bolmysyn, oıý-órnegi men salt-dástúrin dáripteýge basa mán berdińiz. Sizdiń týyndylaryńyz Almaty jáne basqa da qalalardyń áıgili ǵımarattaryna kórik berip tur. Týyndylaryńyz óz elimizben qatar shet memleketterde saqtalýda. Sizdiń eńbekterińizdi álemge belgili mamandar óte joǵary baǵalaıdy. Ulttyq óner jolynda salǵan dara jolyńyz jas býyn azamattary úshin tamasha úlgi-ónege dep sanaımyn, – dedi Memleket basshysy.
Qasym-Jomart Toqaev sanaly ǵumyryn ult rýhanııatyn damytýǵa arnap kele jatqan kórnekti ǵalym, qarymdy qalamger Tursyn Jurtbaı tól tarıhymyzdyń aqtańdaq tustaryn zerttep, halyqtyń sana-sezimin jańǵyrtýǵa eleýli úles qosqanyn atap ótti.
– Abaı Qunanbaıulynyń ómiri men shyǵarmashylyǵyn tereń zerttep, jan-jaqty dáripteýge zor eńbek sińirdińiz. Abaı – ulttyń rýhanı temirqazyǵy, óskeleń urpaqtyń aınymas baǵdary. Shyn máninde, uly oıshyldy taný – qazaqty taný degen sóz. Siz Muhtar Áýezovtiń jáne ult qaıratkerleriniń mol murasy men ónegeli ómiri týraly qundy ǵylymı eńbekter jazdyńyz. Shoqtyǵy bıik kórkem shyǵarmalaryńyz arqyly tól ádebıetimizdiń qundylyǵyn arttyra tústińiz, – dedi Memleket basshysy.
Osyǵan deıin Prezıdent Soltústik Qazaqstan oblysynyń 90 jyldyǵymen quttyqtaǵan bolatyn.
