Beıbitshilik keńesi kópjaqty kúsh-jigerdiń áleýetin arttyratyn, zaman talabyna saı uıym — Prezıdent
VAShINGTON. KAZINFORM — Prezıdent Qasym-Jomart Toqaev Beıbitshilik keńesiniń alǵashqy otyrysynda sóz sóıledi, dep habarlaıdy Aqordanyń baspasóz qyzmeti.
Memleket basshysy sammıtke qatysýshylarǵa iltıpat bildirip, osy tarıhı is-sharany uıymdastyrǵany úshin AQSh Prezıdenti Donald Trampqa alǵys aıtty.
— Donald Tramp atyndaǵy Beıbitshilik ınstıtýtynda ótip jatqan kezdesýimiz batyl ári pragmatıkalyq áreketter sheshýshi ról atqaratyn kezeńmen tuspa-tus kelip otyr. Shyn máninde, bul — sóz kúıinde qalatyn qarar qabyldaıtyn konferentsııa emes, kerisinshe, naqty ári maqsatty sharalar arqyly uzaq merzimdi beıbitshilik ornatýǵa úles qosatyn jıyn. Prezıdent myrza, Sizdiń jahandaǵy beıbitshilik pen turaqtylyqty ilgeriletýdi kózdeıtin aıqyn muratyńyz ben kóregen qadamdaryńyz elimizdiń Beıbitshilik keńesine qosylýyna túrtki boldy, — dedi Prezıdent.
Qasym-Jomart Toqaev Beıbitshilik keńesi kópjaqty kúsh-jigerdiń áleýetin arttyratyn, zaman talabyna saı uıym dep sanaıdy.
— Álemde mundaı bastama kóterilgen joq. Rasynda, bul buryn-sońdy bolmaǵan betburys. Óıtkeni birge kúsh-jiger jumyldyrýdyń arqasynda «Jasampazdyq arqyly beıbitshilik» atty jańashyl tujyrymdamany nemese jobany iske asyrýǵa barlyq múmkindik bar. Sondyqtan, Prezıdent myrza, Sizdiń naqty is-áreket qana beıbitshilikke berik negiz qalaıdy degen ustanymyńyzdy tolyq quptaımyn, — dedi Memleket basshysy.
Budan buryn Memleket basshysy Qasym-Jomart Toqaev Beıbitshilik keńesiniń alǵashqy otyrysyna qatysyp jatqanyn jazǵan edik.