Prezıdent Qasym-Jomart Toqaev Belgııalyqtar Koroli men Patshaıymyn kútip aldy
ASTANA. KAZINFORM — Belgııalyqtar Koroli Fılıpp jáne Patshaıym Matılda mingen ushaq Astanaǵa kelip qondy. Bul Belgııa monarhtarynyń Ortalyq Azııaǵa jasaıtyn alǵashqy memlekettik sapary bolmaq.
Elorda áýejaıynda mártebeli qonaqtardy Memleket Basshysy Qasym-Jomart Toqaev qarsy aldy.
Sonymen birge qarsy alý rásimine QR Prezıdenti Ákimshiliginiń basshysy Roman Sklıar, Premer-Mınıstr orynbasary Jaslan Mádıev, QR Syrtqy ister mınıstri Muhtar Tileýberdi, Astana ákimi Jeńis Qasymbek jáne Quryltaı tóraǵasynyń orynbasary Dınara Zákıeva qatysty.
Koroldik jup Astana áýejaıyna qazaqstandyq Air Astana bortymen keldi.
Memlekettik sapar hattamasyna sáıkes, trap aldynda Qurmet qaraýyly sap túzedi.
Sondaı-aq áýejaıda eki el basshylary shaǵyn quramdaǵy kelissózder ótkizip jatyr.
Aıta keteıik, 11-14 qazan kúnderi Belgııalyqtar Koroli Fılıpp jáne Patshaıym Matıldanyń Qazaqstanǵa memlekettik sapary ótedi.
Sapar baǵdarlamasy tórt negizgi baǵytty qamtıdy. Olar — asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Belgııadan Qazaqstanǵa 110 adamnan turatyn delegatsııa keledi. Onyń quramynda tórt mınıstr, 25 kompanııa basshysy, 10 ýnıversıtet rektory jáne 13 jýrnalıst bar. Delegatsııa quramynyń aýqymdy bolýy Belgııa tarapynyń aldaǵy saparǵa joǵary qyzyǵýshylyq tanytyp otyrǵanyn kórsetedi.
Eýropalyq monarhtar Astana men Almatydaǵy mádenıet jáne ǵylym nysandaryn aralap, eki el arasyndaǵy yntymaqtastyqqa arnalǵan kezdesýlerge qatysady.
Sapar qorytyndysy boıynsha Birlesken málimdeme qabyldanyp, birqatar qujatqa qol qoıylady.
Buǵan deıin Kazinform memlekettik sapardyń kún tártibinde qandaı mańyzdy sharalar josparlanǵanyn jazǵan edi.
