Prezıdent Armenııa men Ázerbaıjan arasyndaǵy qatynasty tezirek retteýge shaqyrdy
EREVAN. KAZINFORM – Erevanda ótken kelissózder barysynda Qazaqstan Prezıdenti Qasym-Jomart Toqaev pen Armenııa Premer-mınıstri Nıkol Pashınıan Ońtústik Kavkazda turaqtylyq pen qaýipsizdikti qamtamasyz etý máselesine aıryqsha nazar aýdardy. Bul týraly Aqordanyń baspasóz qyzmeti habarlady.
«Memleket basshysy Armenııa men Ázerbaıjannyń beıbit kelisim jasaý jónindegi qadamdaryn joǵary baǵalady. Osy oraıda Qazaqstan Prezıdenti Erevan men Baký arasynda tezirek berik ári uzaqmerzimdi beıbitshilik ornaǵany mańyzdy dep atap ótti. Sondaı-aq kelissózder úshin Qazaqstan óz alańyn usynýǵa daıyn ekenin málimdedi», - delingen habarlamada.
Beıbitshilik pen kelisimge naqty kelissózder arqyly qol jetkizýdi jaqtaıtyn Qazaqstannyń bul baǵyttaǵy barlyq is-áreketti qoldaýǵa ázir ekeni aıtyldy. Taraptar Armenııa men Ázerbaıjan arasyndaǵy ýaǵdalastyqtardy naqty júzege asyrý múmkindikterin qarastyrýǵa kelisti.
