Prezıdent: Kásibı kadrlardy daıarlaý úshin júıeli sharalar qabyldaımyz

MÁSKEÝ. KAZINFORM — Memleketter basshylary Oral qalasynda ótip jatqan XXI Qazaqstan — Reseı óńiraralyq forýmynyń plenarlyq sessııasyna beınebaılanys arqyly qatysyp jatyr, dep habarlaıdy Aqordanyń baspasóz qyzmeti.

Shara barysynda Prezıdent jumysshy mamandyq ıeleri eki eldiń ekonomıkalyq órleýine orasan zor úles qosatynyna nazar aýdardy.

— Bıyl Qazaqstanda «Jumysshy mamandyqtarynyń jyly» bolyp jarııalandy. Kóp uzamaı bul jumysty qorytyndylaımyz. Jumysshy mamandyqtaryn jan-jaqty qoldaýǵa, olardyń qoǵamdaǵy bedelin arttyrýǵa jáne kásiptik bilim berý júıesin reformalaýǵa baǵyt aldyq. Atalǵan baǵyttarǵa dáıekti túrde ınvestıtsııa salatyn elder ınnovatsııa men ornyqty damýda kósh bastaıtynyn álemdik tájirıbe kórsetip otyr, — dedi ol.

Sonymen qatar Qasym-Jomart Toqaev jasandy ıntellekt, óndiristik protsesti jappaı tsıfrlandyrý jáne avtomattandyrý jahandyq eńbek naryǵyn túbegeıli ózgertip jatqanyn alǵa tartty.

— Órkenıet kóshi ilgerilegen saıyn eńbekkerlerdi túrli ıntellektýaldyq júıeler men tsıfrlyq platformalardy basqara bilýge mindetteıdi. Mamandardyń joǵary biliktiligi men zamanaýı daǵdylardy meńgerýi elderimizdegi ónerkásip ósimi men tehnologııalyq jańǵyrýǵa negiz bolady. Muny bárimiz jaqsy bilemiz. Sondyqtan kásibı kadrlardy daıarlaý úshin júıeli sharalar qabyldaımyz, — dedi Toqaev.

Bul rette Prezıdent jaqynda elimizde jasandy ıntellektini tehnıkalyq jáne kásiptik bilim berý júıesine engizýdiń tujyrymdamalyq negizi bekitilgenin jetkizdi.

Budan buryn Toqaev pen Pýtın keńeıtilgen quramda kelissóz júrgizgeni habarlandy.