Prezıdent Qarjylyq monıtorıng agenttiginiń ókilettigin keńeıtti
ASTANA. KAZINFORM — Qazaqstan Prezıdenti Qasym-Jomart Toqaev 2025 jylǵy 14 shildede Qarjylyq monıtorıng agenttigi týraly erejege ózgerister men tolyqtyrýlar engizý týraly Jarlyqqa qol qoıdy.
Qujatqa sáıkes:
— Qazaqstan Respýblıkasynyń Qarjylyq monıtorıng agenttigi — Qazaqstan Respýblıkasy Prezıdentine tikeleı baǵynatyn jáne esep beretin, qylmystyq jolmen alynǵan kiristerdi zańdastyrýǵa (jylystatýǵa), terrorızmdi qarjylandyrýǵa jáne jappaı qyryp-joıý qarýyn taratýdy qarjylandyrýǵa qarsy is-qımyl jónindegi Qazaqstan Respýblıkasynyń Zańyna sáıkes qarjylyq monıtorıng júrgizetin jáne ózge de sharalardy qabyldaıtyn, sondaı-aq osy organnyń quzyretine Qazaqstan Respýblıkasynyń zańnamasyna sáıkes ekonomıkalyq jáne qarjylyq quqyq buzýshylyqtardyń aldyn alý, anyqtaý, jolyn kesý, ashý jáne tergeýdi júzege asyratyn memlekettik organ, — delingen Jarlyqta.
Agenttik óz quzyreti sheginde sheshim qabyldaýda derbes, sondaı-aq oblystarda, respýblıkalyq mańyzy bar qalalarda, astanada aýmaqtyq organdary men mamandandyrylǵan memlekettik mekemesi jáne óziniń qaramaǵyndaǵy uıymdary bar.
Erejege kelesi qosymsha fýnktsııalar engizildi:
— agenttikke baǵynysty uıymdarǵa aqparattyq júıeden derekter, málimetter jáne ózge de qujattardy berý qaǵıdasyn bekitedi;
— kezekten tys attestattaýdy ótkizý tártibin, kezeńi men merzimin aıqyndaıdy;
— quqyq qorǵaý organdarynyń basshylarymen birlesip psıhologııalyq-áleýmettik zertteýler júrgizýdiń tártibi men ádisin bekitedi.
Sonymen qatar, jańa redaktsııada agenttiktiń birqatar fýnktsııasy jazylǵan:
— zańǵa sáıkes qarjylyq monıtorıngke jatatyn aqsha nemese ózge de múlikpen jasalatyn operatsııalar týraly málimetter men aqparatty jınaýdy, óńdeýdi, taldaýdy jáne paıdalanýdy júzege asyrady;
— agenttiktiń qyzmetin uıymdastyrady jáne basshylyq etedi, agenttiktiń aýmaqtyq organdary men mamandandyrylǵan memlekettik mekemesiniń, sondaı-aq agenttikke baǵynysty uıymdardyń qyzmetin úılestirý jáne baqylaýdy júzege asyrady;
— qyzmetke úmitkerdiń kásibı quzyretin, negizgi kórsetkishi men básekege qabilettilik kórsetkishin (tsıfrlyq reıtıng) aıqyndaý tártibi men ádisin bekitedi.
Jarlyq 2025 jylǵy 17 shildede qoldanysqa engizildi.
Aıta ketsek, 20 maýsymda Prezıdent sot aktilerin májbúrlep oryndatý boıynsha aqparat almasý týraly Jarlyqqa qol qoıdy.