Prezıdent Qarjylyq monıtorıng agenttiginde jıyn ótkizdi
ASTANA. KAZINFORM – Memleket basshysy Qasym-Jomart Toqaev Qarjylyq monıtorıng agenttiginde jıyn ótkizdi.
Prezıdent sala mamandaryn kásibı merekesimen quttyqtap, osydan bes jyl buryn, el ishinde aýqymdy ózgerister qolǵa alynyp jatqan tarıhı kezeńde qurylǵan Qarjylyq monıtorıng agenttigi ózine júktelgen jaýapkershilik pen mindetti abyroımen oryndap kele jatqanyna nazar aýdardy.
– Jalpy, osyndaı qysqa merzim ishinde kóp jumys isteldi, biraz tájirıbe jınaqtaldy. Búginde Qarjylyq monıtorıng agenttigi elimizdiń ekonomıkalyq jáne ulttyq qaýipsizdik júıesinde mańyzdy ról atqaratyn derbes qurylymǵa aınaldy. Muny tabandy eńbek pen adal qyzmettiń nátıjesi deýge bolady. Agenttik qyzmetkerlerine rızashylyǵymdy bildiremin. Biraq bosańsýǵa bolmaıdy. Sebebi aldymyzda bıik maqsattar men aýqymdy jumys bar. Ásirese, qazir óte qarqyndy damyp jatqan tsıfrlyq tehnologııa men jasandy ıntellekt dáýirinde jumysqa túbegeıli jańa kózqaraspen qaraý mindeti tur. Bul másele týraly «Turkistan» gazetine bergen suhbatymda jáne Ulttyq quryltaı otyrysynda anyq aıttym, - dedi Qasym-Jomart Toqaev.
Memleket basshysy Quqyq qorǵaý mekemeleri, sonyń ishinde Qarjylyq monıtorıng agenttigi tehnologııalyq turǵydan artta qalyp qoısa, bul jaǵdaı ulttyq qaýipsizdigimizge qater tóndirýi múmkin ekenin aıtty.
– Tsıfrlyq tásilderdi jáne jasandy ıntellekt júıesin Agenttik qyzmetine jappaı engizý – kezek kúttirmeıtin asa mańyzdy mindet. Onsyz tıimdi jumys bolmaıtyny anyq. Qazir kúshtik qurylymdar men qylmys áleminiń arasyndaǵy kúres tehnologııalyq turǵydan múlde basqa sıpatqa ıe boldy. Qaraqshylar, ıaǵnı qylmyskerler jasandy ıntellektini belsendi paıdalanatyn boldy. Ony sizder jaqsy bilesizder. Quqyq qorǵaý mekemeleri, sonyń ishinde Qarjylyq monıtorıng agenttigi tehnologııalyq turǵydan artta qalyp qoısa, bul jaǵdaı ulttyq qaýipsizdigimizge qater tóndirýi múmkin. Zaman talabyna saı ozyq bolý úshin, eń aldymen, durys sheshim qabyldap, tıimdi áreket etýimiz kerek. Quqyq qorǵaý organdary tııanaqty, belsendi jumys istep, ozyq tsıfrlyq sheshimder arqyly eldegi ózgeristerdiń jedel jáne sapaly iske asýyna septigin tıgizýi múmkin. Bul aýqymdy ekonomıkalyq jańǵyrý jolyna bet burǵan Qazaqstan úshin óte mańyzdy qadam bolmaq, - dedi Memleket basshysy.