Prezıdent: Qarjylyq alaıaqtyqqa qarsy jańa tásil oılastyrý qajet

ASTANA. KAZINFORM – Memleket basshysy Qasym-Jomart Toqaev Qarjylyq monıtorıng agenttiginde jıyn ótkizgen jıynda qarjylyq alaıaqtyqqa qarsy is-qımyldyń jańa tásilderin oılastyrý qajet ekenin aıtty. Bul týraly Aqorda habarlady.

Prezıdenttiń aıtýynsha, agenttik qarjy pıramıdalarymen belsendi kúres júrgizip jatyr. Tek byltyrdyń ózinde 140-tan astam qylmystyq is tergelip, jarty mıllıonnan asa adamnyń qarjysyn tartpaqshy bolǵan 15 myń saıt pen 123 chat jabyldy. Alaıda qabyldanyp jatqan sharalar da, túsindirý jumystary da jaǵdaıdy túbegeıli ózgerte almaı tur. Áıtse de oń úrdis bar. Nege? Óıtkeni alaıaqtar pıramıdany túrli qarjy quraldary sııaqty usynady. Al azamattar olardyń arbaýyna túsip, bar tapqan-taıanǵanynan aıyrylyp qalyp jatyr.

- Sondyqtan qarjylyq alaıaqtyqqa qarsy is-qımyldyń tıimdi sharalaryn ázirlep, problemanyń túp tamyryn anyqtaǵan jón. Óz áreketiniń zańsyz ekenin bile tura, adamdardy túrli alaıaqtyq shemalarǵa tartatyn pıramıda qatysýshylaryna quqyqtyq jaýapkershilik engizý máselesin qarastyrý qajet. Mundaı alaıaqtardy nemese qymsynbaı qylmysqa baratyn jandardy túrmege qamap, qylmystyq jazaǵa tartý kerek. Eger Qarjylyq monıtorıng agenttigi, Úkimet osyndaı túzetýlerdi usynsa, men qoldaımyn. Máseleni qarastyryńyzdar. Osy tektes batyl sheshimder qabyldamasaq, ahýaldyń ońala qoıýy ekitalaı. «Baıaǵy jartas – sol jartas» kúıinde qala beredi, – dedi Memleket basshysy.

Prezıdent qarjyny krıptovalıýtaǵa aınaldyryp, shetelge shyǵarý jaǵdaılary da azaımaı turǵanyn atap ótti.

Sonymen qatar JI múmkindigin paıdalanyp, taldaý-saraptaý jumysyn kúsheıtýdi tapsyrdy.