Prezıdent káriz júıesi boıynsha elorda ákimdigine birqatar tapsyrma júktedi
NUR-SULTAN. QazAqparat - Elordany odan ary damytý máseleleri jónindegi májiliste Memleket basshysy Qasym-Jomart Toqaev qaladaǵy jańbyr sýy aǵatyn káriz júıesi problemasyn kóterdi, dep habarlaıdy QazAqparat tilshisi.
«Buǵan deıin birneshe márte kóterilgen máseleniń biri - ol jańbyr sýy aǵatyn káriz júıesi jumysynyń elorda turǵyndaryna eleýli qolaısyzdyq týdyrýyna qatysty. Bundaı jaǵdaıǵa jol berilmeýi tıis. Jańbyr kezinde jınalǵan sýdan burynǵysynsha Momyshuly dańǵyly men Toqpanov kóshesi qıylysynda, Ýálıhanov kóshesi men Baraevta, Turan dańǵyly men Uly Dala kóshesinde júrip ótý qıyndyq týdyrady», - dedi Qasym-Jomart Toqaev.
Osyǵan baılanysty Prezıdent qala ákimdigine birqatar tapsyramany júktedi.
«Ákimdikke osy problemany sheshý boıynsha shara qabyldaý júkteledi. Sonymen qatar kollektorlar men jańbyr sýy aǵatyn káriz júıesi qurylystary úshin biryńǵaı eksplýatatsııalyq uıymdy aıqyndaý tapsyrylady. Bul erterekte sheshimin tabýy tıis naqty joba», - dedi Memleket basshysy.
