Prezıdent qaraýyna UQShU múshe elder kelisimine ózgerister engizý usynylady
ASTANA. KAZINFORM – Qazaqstan Respýblıkasy Prezıdenti Qasym-Jomart Toqaevtyń qaraýyna Ujymdyq qaýipsizdik týraly shart uıymyna múshe memleketterdiń yntymaqtastyǵy týraly kelisim (2015 jylǵy 15 qyrkúıektegi) aıasynda áskerı jáne basqa da quralymdardy, olardyń jyljymaly múlkin, sondaı-aq áskerı maqsattaǵy ónimdi tasymaldaý salasyna ózgerister engizý usynylady. Qujat jobasy «Ashyq NQA» saıtynda jarııalandy.
«Áskerı jáne basqa da quralymdar» degen sózderden keıin «quralymdar qolbasshylyǵyna taǵaıyndalǵan jeke quram» degen sózdermen tolyqtyrylsyn. «Ulttyq ulan» degen sózderden keıin «polıtsııa áskeri» degen sózdermen tolyqtyrylsyn. Ótkizý pýnktterinde «memlekettik shekarany kesip ótýdi» degen sózder «ótkizý pýnktterinde memlekettik shekarany kesip ótý qaǵıdalaryn saqtaýdy baqylaýdy júzege asyrýǵa qarý-jaraqty, áskerı tehnıka men áskerı-tehnıkalyq múlikti tranzıtteýge ruqsat berýge» degen sózdermen aýystyrylsyn», - delingen jobada.
Sondaı-aq, tótenshe jaǵdaılar saldaryn joıýdyń qasyna gýmanıtarlyq kómek kórsetý degen tirkesti engizý usynylyp otyr.
Sonymen qatar qujatta aıtylǵandaı, tasymaldaý, tranzıtteý taraptardyń ýákiletti organdary aldyn ala keliskennen jáne josparlaǵannan keıin ǵana júzege asyrylady. Qarý-jaraqty, áskerı tehnıka men áskerı-tehnıkalyq múlikti tranzıtteý taraptardyń quzyretti organynyń tıisti ruqsatymen júzege asyrylady.
Taraptar depozıtarııdi osy kelisimniń kúshine enýi úshin qajetti memleketishilik rásimderdiń oryndaǵany týraly habarlaýmen bir ýaqytta ýákiletti jáne quzyretti organdardy taǵaıyndaý týraly habardar etedi. Depozıtarıı taraptardyń ýákiletti jáne quzyretti organdarynyń tizbesin taraptarǵa jiberedi. Quzyretti organ ózgergen jaǵdaıda 30 kún merzimde dıplomatııalyq arna arqyly depozıtarııdi habardar etedi, ol belgilengen tártippen bul týraly basqa taraptardy habardar etedi.
«Kelisimge qatysýshy emes memleketterdiń aýmaǵy boıynsha tranzıtteý qabyldaýshy tarap jáne jiberýshi tarap nemese UQShU-ǵa memlekettermen jasaǵan tıisti sharttarda kózdelgen tártippen júzege asyrylady. Taraptar bul úshin qajetti normatıvtik quqyqtyq bazany qalyptastyrý úshin kúsh-jiger jumsaıdy», - dep jazylǵan hattamada.
Odan bólek, tasymaldaýdy júzege asyrý kezinde apat bolǵan jaǵdaıda jábirlenýshi tarapqa qajet bolǵan kezde oqıǵanyń saldaryn joıý jumysyn júzege asyrý úshin tıisti aqparatty, kúshter men quraldardy dereý berip, saldaryn ýaqtyly joıý jáne olardyń sebepterin tergep-tekserý sharalaryn qabyldaıdy. Bul rette izdeý-qutqarý is-sharalaryn taraptardyń taǵaıyndalǵan kúshteri men quraldary óteýsiz negizde uıymdastyrady.
Qujat jobasy 2024 jylǵy 5 qarashaǵa deıin qoǵamdyq talqylaýǵa usynylyp otyr.
Eske sala ketsek, bıyl maýsymda Memleket basshysy Qasym-Jomart Toqaev UQShU-ǵa múshe elder parlamentteri palatalarynyń spıkerlerimen kezdesti.
Memleket basshysy zań shyǵarý organdarynyń spıkerlerine iltıpat bildire otyryp, Reseıdiń UQShU Parlamenttik Assambleıasyna turaqty mártebe berý týraly usynysyn qoldaıtynyn aıtty. Prezıdent basqa elderdiń delegatsııalaryn osy bastamany qoldaýǵa shaqyrdy.
