Prezıdent Qaraǵandydaǵy kúltóbe qurylysy týraly: Turǵyndardyń narazylyǵy oryndy
«Qala qarqyndy damyp keledi. Munda turǵyn úılerdiń, áleýmettik-mádenı nysandardyń, kommertsııalyq alańdardyń qurylysy qarqyndy júrip jatyr. Qaraǵandyǵa odan ári de ornyqty damý úshin qosymsha jylý kózderi qajet.
Osyǵan baılanysty Úkimetke Qaraǵandy qalasynyń úshinshi jylý qubyrynyń qurylysyn aıaqtaýǵa qajetti qarajat bólýdi tapsyramyn. Meniń bilýimshe, qaraǵandylyqtar qala sheginde jergilikti jylý-elektr ortalyǵyna qajetti jańa kúltóbe salýǵa qarsy. Meniń oıymsha, turǵyndardyń narazylyǵy óte oryndy. Sondyqtan oblys ákimdigi bul jobany jurtshylyqtyń pikirin eskere otyryp iske asyrýy kerek», -dedi Prezıdent.
Memleket basshysynyń paıymynsha, Qaraǵandy qalasy eldiń ındýstrıaldyq lokomotıvi bolǵandyqtan ǵylym-bilim men mádenıettiń gúldenýine qolaıly qala bolýǵa tıis.
«Qalany damytýdyń bas jospary 2007 jyldan beri jańartylmaǵan. Ony ýrbanısterdiń ozyq ázirlemeleri men jurtshylyqtyń pikirin eskere otyryp, keshendi túrde jańartý qajet.
Jalpy, azamattardy sheshim qabyldaý protsesine keńinen tartpasa, qala men óńirdiń ornyqty damýy múmkin emes», - dedi Qasym-Jomart Toqaev.