Prezıdent Qanat Bozymbaev pen Marat Sultanǵazıevtiń qatelikterin atady
QONAEV. KAZINFORM – Prezıdent Qasym-Jomart Toqaev Alatau Smart-City salý mindetteri men óńirdegi naqty áleýmettik-ekonomıkalyq jaǵdaı arasynda qarama-qaıshylyq aıqyn baıqalatynyn aıtty.
- Negizgi ınfraqurylymnyń ozyq damýy.
Qalaǵa qosylǵan eldi mekenderdiń (Jetigen, Qoıanqus jáne taǵy basqalar) turǵyndary turmysqa qajetti qarapaıym jaǵdaıdyń jasalmaǵanyn aıtady. Elektrdiń jıi óshýine qatysty aryz-shaǵymnyń kóptigin bylaı qoıǵanda, turaqty ınternettiń, sapaly joldyń, ortalyqtandyrylǵan sýdyń joqtyǵyn alǵa tartady.
Mundaı problemalar oblystyń barlyq aýmaǵynda bar. Máselen, 2025 jyly elektr jelisiniń tozýy 70 paıyzǵa jýyqtap, sonyń saldarynan elektr qýatynyń óshirilýi 919 ret, al jyl basynan beri 201 márte tirkelgen, - dedi Qasym-Jomart Toqaev.
Memleket basshysy qalanyń jańa aýdandarynda ınjenerlik kommýnıkatsııa tartý jumystary áli kúnge deıin jobalaý satysynda qalyp otyrǵanyn atap ótti.
- Úsh qosalqy stantsııany jóndeý jáne sý alý qondyrǵysynyń qýatyn arttyrý jobalary belgilengen kesteden keshigýde.
Alatau Smart-City salý mindetteri men óńirdegi naqty áleýmettik-ekonomıkalyq jaǵdaı arasynda qarama-qaıshylyq aıqyn baıqalady. Muny ashyq aıtaıyq. Bul jaǵdaıdy Premer-mınıstrdiń orynbasary Qanat Bozymbaevtyń, sonymen qatar, ákim Marat Sultanǵazıevtiń tarapynan jiberilgen olqylyq dep sanaımyn.
Jalpy, jańa energııa qýaty kózderin keńeıtý men iske qosý qajettigi – eldik deńgeıdegi másele, - dedi Qasym-Jomart Toqaev.
Onyń sózinshe, mamandardyń basym bóligi energııa tapshylyǵy máselesiniń negizgi sheshimi jańa generatsııany iske qosý dep biledi. Pikirtalastyń barlyǵy eki aspektige – qansha jáne qandaı elektr stantsııalaryn salý qajet degen saýalǵa kelip tireledi.
- Biz qashanda talqylaýǵa daıyn turamyz. Biraq qazirgi ýaqytta elimiz energııany qanshalyqty kóptep joǵaltyp otyr degen negizgi saýaldy eshkim qozǵamaıdy, - dedi Prezıdent.
Aıta keteıik, Prezıdent Alataýdy damytýǵa bıýdjet qarjysyn turaqty baǵyttaýdy tapsyrdy.
