Prezıdent kadr tapshylyǵy baıqalatyn salalardy atady
ASTANA. KAZINFORM — 2035 jylǵa deıin elimizge 2,9 mıllıon maman qajet bolady. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Infraqurylymdy aýqymdy jańǵyrtý aıasynda ondaǵan myń jańa jumys orny ashylady. Boljam boıynsha 2035 jylǵa deıin elimizge 2,9 mıllıon maman, sonyń ishinde 1,8 mıllıon jumysshy maman qajet. Kadr tapshylyǵy, ásirese, ónerkásip, qurylys, aýyl sharýashylyǵy jáne ІT salasynda baıqalmaq. Qazirgi ýaqytta elimizdegi 763 kolledjde 500 myńnan asa stýdent oqıdy. Erte bastan kásiptik baǵdarlaýǵa jáne dýaldi oqytýǵa erekshe nazar aýdarylyp otyr, — dedi Prezıdent.
Memleket basshysynyń aıtýynsha, qajetti mashyqtardy meńgergen, alaıda salalyq dıplomy joq adamdar kásibı biliktilikti tanýǵa arnalǵan 22 ortalyqta óz quzyretin rastaı alady.
— Astanada júzege asyrylyp jatqan «Joltap» jobasyn aıryqsha atap ótkim keledi. Bul — bıznestiń tikeleı qatysýymen jumysshy jáne tsıfrlyq sala mamandaryn, atap aıtqanda, tiginshi men dánekerleýshiden bastap veb-ázirleýshi men dızaınerge deıin daıarlaıtyn qysqa merzimdi oqytý modeli. Úsh jyl ishinde 22 myńnan asa adam bilim alyp, 60 paıyzy jumysqa ornalasty, eki myńǵa jýyq jan jeke kásibin ashty. Osy tabysty tájirıbeni barlyq óńirge taratý qajet. Ár azamattyń ómirde óz ornyn taýyp, otbasyn adal eńbekpen asyraýyna jáne Otanyna paıdasyn tıgizýge jaǵdaı jasaý — ortaq mindetimiz, — dedi Qasym-Jomart Toqaev.
Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.
