Prezıdent Ispanııa Korolin ulttyq merekemen quttyqtady
ASTANA. KAZINFORM — Qasym-Jomart Toqaev Ispan halqy kúnine oraı Korol VI Felıpege quttyqtaý jedelhatyn joldady, dep habarlaıdy Aqordanyń baspasóz qyzmeti.
Memleket basshysy Ispanııa halqynyń birligin, baı murasy men ulttyq rýhyn aıshyqtaıtyn meıramnyń tarıhı mańyzyna toqtaldy.
— Ispanııa saıası jáne áleýmettik-ekonomıkalyq damýda zor jetistikke qol jetkizgen el retinde halyqaralyq qoǵamdastyqta laıyqty orynǵa ıe. Elińiz órkendeý jolynda alǵa qaraı nyq qadam basa beretinine senimim kámil, — dep jazylǵan jedelhatta.
Prezıdent berik dostyq pen ózara senimge negizdelgen qazaq-ıspan qarym-qatynasynyń qarqyndy damyp kele jatqanyn atap ótip, san qyrly yntymaqtastyqtyń odan ári nyǵaıa túsetinine senim bildirdi.
Qasym-Jomart Toqaev Koroldiń memlekettik qyzmetine tabys, al ıspan halqyna baq-bereke tiledi.
Buǵan deıin Toqaev Koreıa Respýblıkasynyń Ulttyq kúnine oraı Prezıdent Lı Chje Meńge quttyqtaý jedelhatyn joldaǵanyn jazǵan edik.
