Prezıdent iskerlik belsendilikti yntalandyrý qajettigin aıtty

ASTANA. QazAqparat – Salyq kodeksi jáne salyq saıasaty tutas túsinikti, turaqty bolýy qajet. Bul týraly Memleket basshysy Qasym-Jomart Toqaev VIII saılanǵan QR Parlamentiniń birinshi sessııasynda aıtty, dep habarlaıdy QazAqparat tilshisi.

Memleket basshysy elimizdiń negizgi basymdyqtary – turǵyndardyń ál-aýqatyn arttyrý jáne ulttyń jańa sapasyn qalyptastyrý, sol arqyly tamyry tereńde jatqan memlekettilik dástúrimizdi nyǵaıta túsý ekenin atap ótti.

«Osy oraıda, men Parlamenttiń aldaǵy jumysy týraly oıymdy ortaǵa salǵym keledi. Eń aldymen, iskerlik belsendilikti yntalandyrý qajet. Ol úshin ádil, turaqty ári ashyq salyq júıesin qalyptastyrý kerek. Salyq saıasatynyń jańa modeli ulttyq baılyqty tıimdi bólýdi, ekonomıkalyq belsendiliktiń joǵary deńgeıi men ekonomıkanyń basym baǵyttaryn naqty qoldaýdy qamtamasyz etýge tıis. Salyq kodeksi jáne tutas salyq saıasaty túsinikti, turaqty bolýy qajet», - dedi Qasym-Jomart Toqaev.

Sonymen birge, fıskaldyq organdardyń bıznespen qarym-qatynasyna qatysty búkil protsesti tolyq tsıfrlandyrý kerektigine nazar aýdardy.

«Bul kásipkerlerdiń tirshiligin aıtarlyqtaı dárejede jeńildetýge jáne bıýdjet kirisin júıeli túrde ulǵaıtýǵa septigin tıgizedi. Parlamentte memlekettik bıýdjetke mol kiris ákeletin korporatıvtik tabys salyǵy men qosymsha qun salyǵyna qatysty mólsherlemelerdi ártaraptandyrý múmkindigin talqylaýǵa bolar edi», - dedi Prezıdent.