Prezıdent: Іshki naryqqa baǵyttalǵan óńdeý ónerkásibin damytý qajet
«Básekege qabiletti ekonomıka degenimiz – ártaraptandyrylǵan ekonomıka. Pandemııa jáne qazirgi geosaıası daǵdarys shıkizat naryǵynyń turaqsyz ekenin aıqyn kórsetti. Qazba baılyqqa ǵana arqa súıep, qamsyz otyratyn zaman kelmeske ketti. Jer qoınaýynan shyqqan qazynanyń qosymsha qunyn barynsha arttyrý kerek. Ony sapaly jáne suranysqa ıe taýarǵa aınaldyrý óte mańyzdy. Buǵan deıingi ındýstrııalandyrý jumysynyń barysynda shıkizattyq emes sala oıdaǵydaı damyǵan joq. Azyq-túlik pen kúndelikti tutynatyn taýardyń ózin áli kúnge deıin syrttan satyp alyp otyrmyz. Inflıatsııanyń ósýine basty sebeptiń biri - osy», - dep toqtaldy Prezıdent VIII saılanǵan QR Parlamentiniń birinshi sessııasynda.
Bul máseleni sheshý jolynda Memeleket basshysy óz áleýetimiz sheginde ishki naryqqa baǵyttalǵan óńdeý ónerkásibin damytýdy tapsyrdy.
«Elimizdiń ekonomıkasy syrtqy saýdaǵa jáne ınvestıtsııaǵa árdaıym ashyq. Qazaqstan – Dúnıejúzilik saýda uıymynyń múshesi. Sondyqtan, syrtqy saýdamyzdy erkin túrde damytýymyz kerek. Biraq, keminde óz áleýetimiz jetetin nárselermen ózimizdi qamtamasyz etýimiz qajet. Mysaly, shıkizat ta, mamandar da, keıbir tehnologııa da óz elimizde bar. Eldiń ishki suranysyn óteýge qatysty bir negizgi ustanym bolýǵa tıis. Eń aldymen, ishki naryqqa baǵyttalǵan óńdeý ónerkásibin damytýymyz qajet», - dedi Qasym-Jomart Toqaev.
