Prezıdent Isekeshevke: Astananyń basshysy retinde ózińdi qashan kórsetetinińdi kúttim
ASTANA. QazAqparat - QR Prezıdenti Nursultan Nazarbaev Áset Isekeshevtiń Astana ákimdigine birshama daıyndyqpen kelgenin aıtty, dep habarlaıdy QazAqparat.
«Áset Orentaıuly edáýir tájirıbe jınaqtady, kóp jyldar boıy mınıstrlikte qyzmet etti. Osy tájirıbeni alyp, qala basshysy retinde qashan kórsetetinińdi kúttim», - dep atap ótti Elbasy EKSPO kórmesine daıyndyq jumystaryn pysyqtaýǵa arnalǵan jıynda.
Osydan soń Prezıdent Astanada mádenıet jáne sport nysandary bos turǵanyn aıtyp, Astana ákimin, Mádenıet jáne sport mınıstrin synǵa aldy.
«Qanshama mádenıet, sport nysandary bar, ony eshkim basqaryp jatqan joq, qańyrap bos tur, aqsha tappaıdy. Bıýdjettik qarajatqa qarap otyr. Batystyń arnaıy kompanııalarynyń basqarýyna berińizder. Usynystar bar emes pe. Biregeı, úlken sport keshenderi, teatrlar salyndy. Osynda syrttan adamdar kelýi tıis, jarystar, kontsertter ótýi kerek. Eshkim aınalysyp jatqan joq. Barlyǵy memlekettiń qamtýynda tur. Arystanbek, ne isteımiz?», - dep surady Prezıdent QR Mádenıet jáne sport mınıstri Arystanbek Muhamedıulyna qaratyp aıtqan sózinde.
Óz kezeginde, Mádenıet jáne sport mınıstri mádenıet nysandary 99 protsentke toly ekendigin jáne EKSPO sharalaryna bıletter az qalǵanyn alǵa tartty.
