Prezıdent ınvestıtsııanyń quqyqtyq qorǵalýyn jáne turaqtylyǵyn qamtamasyz etýdi tapsyrdy
Eske sala keteıik, búgin Memleket basshysy Sheteldik ınvestorlar keńesiniń jumys kezdesýine qatysty.
Osy jıynda Memleket basshysy Úkimettiń ınvestıtsııa tartýdyń jańa tetikteri usynylǵan baıandamasyna, onyń tıptik kelisimsharttardy jetildirý bóligine basa mán berdi.
Prezıdent bul usynystardy qoldap, ınvestıtsııanyń quqyqtyq turǵydan qorǵalýyn jáne turaqtylyǵyn qamtamasyz etýdi, sondaı-aq, qajet jaǵdaıda ınvestıtsııalyq jeńildikter jasaýǵa tıisti mehanızmderdiń bárin muqııat pysyqtaý qajettigin aıtty.
– Barlyq jobanyń geologııaǵa, naryqtan shalǵaı ornalasýyna, munaı túrlerine baılanysty óz erekshelikteri bolǵandyqtan, «birkelki ádisten» qashýymyz kerek. Úkimet jobalardy kúrdeliligi men mańyzy boıynsha júıelep, olardy retteýdiń jáne qoldaýdyń tıisti tetikterin aıqyndaýy qajet, – dedi Qasym-Jomart Toqaev.
Osyǵan baılanysty Memleket basshysy Úkimetke jumys tobynyń kelesi otyrysyna jetildirilgen tıptik kelisimsharttyq mehanızm ázirleýdi tapsyrdy.
Budan bólek Prezıdent kómirsýtegin qaıta óńdeýde ınvestıtsııany retteýdiń zamanaýı jáne ońtaıly tetigin ázirleý qajettigin aıtty.
Memleket basshysy jergilikti ónimdi arttyrý máselesine arnaıy toqtaldy.
Bul rette ol tehnologııa transfertin jáne óndiristi bir jerge shoǵyrlandyrýdy qamtamasyz etý úshin naqty sharalar ázirleý jóninde Úkimetke bergen tapsyrmasyn eske saldy.
