Prezıdent Yntymaq aýylyndaǵy №30 orta mektepti aralap kórdi
ASTANA. KAZINFORM - Qasym-Jomart Toqaev Taldyqorǵan qalasynyń irgesindegi Yntymaq aýylynda bıyl paıdalanýǵa berilgen №30 mektepti aralap kórdi.
1200 oqýshyǵa eseptelgen bilim oshaǵynyń qurylysy jergilikti bıýdjettiń jáne Bilim berý ınfraqurylymyn qoldaý qorynyń esebinen qarjylandyrylǵan.
Zamanaýı úlgide jabdyqtalǵan mektepte 77 oqý kabıneti, mýltımedıa synyptary, sport, gımnastıka, májilis pen kitaphana zaldary, aǵash, metall jáne tigin sheberhanalary bar.
Prezıdent jańa oqý ordasyn aralap kórip, oqýshylarmen áńgimelesti. Memleket basshysy mektepke avtobýs syıǵa tartty.
Jalpy, bıyl Jetisý oblysynda 3 jańa mektep ashylǵan. Onyń ishinde ekeýi «Jaıly mektep» ulttyq jobasy aıasynda salyndy. Atap aıtqanda, Panfılov aýdanynyń Jarkent qalasynda 1200 oryndyq, Kóksý aýdanynyń Qaratal aýylynda shaǵyn jınaqty mektep paıdalanýǵa berildi. Qazirgi kezde oblys boıynsha 5 bilim oshaǵynyń qurylysy júrgizilip jatyr.
Jetisý oblysynda bıylǵy on aıda ónerkásip óndirisi 3,9 paıyzǵa óskeni týraly jazdyq.
