Prezıdent ınflıatsııany turaqtandyrýdy Úkimettiń ózekti mindeti retinde atady
ASTANA. KAZINFORM — Bul týraly Memleket basshysy Qasym-Jomart Toqaev «Altyn sapa» jáne «Paryz» syılyǵynyń laýreattaryn, «Qazaqstannyń úzdik taýary» respýblıkalyq kórme-konkýrsynyń jeńimpazdaryn marapattaý rásiminde aıtty.
Prezıdent ınflıatsııany turaqtandyrýdy jáne tómendetýdi, ekonomıkanyń ornyqty ósimin qamtamasyz etýdi, sondaı-aq azamattardyń naqty tabys tabýyna jaǵdaı jasaýdy Úkimettiń ózekti mindeti retinde atady.
— Úkimet júrgizip otyrǵan ekonomıkalyq saıasat aıasynda ınflıatsııany turaqtandyrý jáne tómendetý, ekonomıkanyń ornyqty ósimin qamtamasyz etý, sondaı-aq azamattardyń naqty tabys tabýyna jaǵdaı jasaý óte ózekti mindet sanalady. Osy baǵytta taıaýda Úkimet, Ulttyq bank pen Qarjy naryǵyn retteý jáne damytý agenttigi 2026-2028 jyldarǵa arnalǵan birlesken is-qımyl baǵdarlamasyn qabyldady. Men bul jaıynda aýyl ákimderiniń dıalog-platformasynda aıtqan edim. Atalǵan baǵdarlamany tıimdi júzege asyrý úshin barlyq salalyq organdar men ákimdikter jumyla jumys isteýi qajet ekenin taǵy da atap ótkim keledi. Kásipkerler úshin salyq, tarıf jáne retteý saıasatynyń aıqyn ári ádiletti bolǵany erekshe mańyzdy. Jańa Salyq kodeksi memleket pen bıznes arasyndaǵy yntymaqtastyq modelin jańǵyrtady. Kásipkerliktiń ornyqty damýy ózara mindetterdi oryndaýǵa negizdeletinin túsingenimiz jón. Osy oraıda memleket qolaıly iskerlik orta qalyptastyrady. Al bıznes salyqtan jaltarmaıdy. Bul damyǵan, órkenıetti elderdiń barlyǵyna tán, — dedi Prezıdent.
Sondaı-aq osy jıynda Memleket basshysy Úkimetke kásipkerlerdiń jańa Salyq kodeksiniń keıbir normalaryn iske asyrý máselesine qatysty ótinishterin muqııat saralaýdy tapsyrdy.
— Soǵan qaramastan maǵan bıznes tarapynan jańa Salyq kodeksiniń keıbir normalaryn iske asyrý máselesine qatysty ótinishter túsip jatyr. Ótinishterdiń mazmuny barshaǵa málim, olar buqaralyq aqparat quraldarynda jarııalanýda. Úkimet olardy muqııat saralap, aqylǵa qonymdy sheshim tabady dep oılaımyn. Anyǵyn aıtqanda, basqa jol joq. Bul — memlekettik aýqymdaǵy mindet. Salyqtyq ákimshilendirýdi jetildirýge basa mán berý qajet. Atalǵan máseleni tsıfrlyq quraldar arqyly sheshý kásipkerlerdi alańdatyp otyrǵan kóptegen túıtkildiń túıinin tarqatýǵa múmkindik beredi. Kelesi jyly Qazaqstandyq taýar óndirýshiler reestri men Taýarlardyń ulttyq katalogy engiziletinin de eskerýge tıispiz. Jańadan iske qosylatyn bul tetikter keıbir kásiporyndardyń memlekettik satyp alý baıqaýlarynda negizsiz artyqshylyqqa ıe bolý máselesin retteýge yqpal etýi kerek. Úkimet «Atameken» palatasymen birge osy jyldyń sońyna deıin bıznes-qoǵamdastyqqa zııany tımeıtin jańa normalar engizýdi qamtamasyz etkeni jón, — dedi Memleket basshysy.
Aıta keteıik, búgin Prezıdent «Meıirim» ordenin taǵaıyndady.
Osy jıynda Prezıdent elimizde tabysty bıznespen aınalysýǵa qolaıly jaǵdaı jasalǵanyn aıtty.