Prezıdent HІH ǵasyrda ashylǵan eń alǵashqy shıpajaı Qapal-Arasandy qaıta jańǵyrtýdy tapsyrdy
«Jetisýdiń keremet tabıǵaty jáne erekshe aýa raıy saýyqtyrý oryndaryn damytý úshin óte qolaıly. Osy múmkindikti óńirdegi medıtsına ortalyqtary tıimdi qoldanýy kerek dep oılaımyn. Onda zaman talabyna saı emdeý jáne ońaltý baǵdarlamalaryn qolǵa alýǵa bolady. Emdeý-saýyqtyrý týrızminiń bolashaǵy zor. Osy aımaqta kezinde «Qapal-Arasan» shıpajaıy óte tanymal bolatyn. Bul – sonaý HІH ǵasyrda ashylǵan Qazaqstandaǵy alǵashqy emdeý-saýyqtyrý orny. Osy shıpajaıdy qaıta jańǵyrtý máselesin qarastyrǵan jón. Ult saýlyǵyn jaqsartý úshin balalar sportyn jáne buqaralyq sportty nasıhattaýymyz kerek. Elimizde «Deni saý ult» ulttyq jobasy júzege asyrylyp jatyr. Onda 2025 jylǵa qaraı dene shynyqtyrýmen jáne sportpen shuǵyldanatyn azamattardyń úlesin 50 paıyzǵa deıin jetkizý mindeti qoıylǵan. Qazir Jetisý oblysynda bul kórsetkish – 34 paıyz. Kózdegen maqsatqa jetý úshin sport ınfraqurylymyn damytý qajet. Muny, ásirese, aýyldyq jerlerde qolǵa alǵan jón», - dep atap ótti Prezıdent.
Onyń aıtýynsha, Qazaqstanda kórikti jerler óte kóp. Osyny utymdy qoldanýymyz kerek.
«Jetisý oblysynyń ákimdigi týrızmdi damytýǵa aıryqsha mán berýi qajet. Ásirese, Alakól men Balqashtyń orasan zor áleýeti bar. «Altynemel» jáne «Jońǵar Alataýy» ulttyq parki – ekologııalyq týrızmdi damytý úshin taptyrmaıtyn jer. Tekelidegi áıgili Shaja jáne Qora saılary keremet kórinisterge toly. Mine, osynyń bári – tunyp turǵan baılyq. Árıne, týrıster kóptep kelý úshin tıisti ınfraqurylym salyp, qolaıly jaǵdaı jasaý kerek. Bul – ońaı sharýa emes. Sońǵy jyldary bul baǵytta birshama jumys atqaryldy. Biraq, munymen shektelýge bolmaıdy», - dep túıindedi Memleket basshysy.
