Prezıdent Higgsfield AI jáne MA7 Ventures ókilderimen jasandy ıntellektini damytý máselesin talqylady
ASTANA. KAZINFORM – Memleket basshysy qazaqstandyq IT-kásipkerler Erzat Dýlat pen Murat Ábdirahmanovty qabyldady. Bul týraly Aqordanyń baspasóz qyzmeti habarlady.
Qasym-Jomart Toqaev Higgsfield AI startapynyń tehnıkalyq dırektory Erzat Dýlatpen jáne MA7 Ventures venchýrlik platformasynyń negizin qalaýshy Murat Ábdirahmanovpen kezdesip, jasandy ıntellektini ekonomıkaǵa, memlekettik basqarý isine jáne áleýmettik salaǵa júıeli túrde engizý, sondaı-aq IT-kásipkerlikti, venchýrlik jáne AI-ındýstrııany damytý máselelerin talqylady.
Prezıdent Higgsfield AI startapynyń jetistigin joǵary baǵalap, elimizde jasandy ıntellekt salasynda jahandyq kóshbasshy sanalatyn kompanııanyń qurylýy zor tabys ekenin aıtty.
Memleket basshysynyń aıtýynsha, Qazaqstan IT salasyndaǵy kompanııalar tez arada iske qosylyp, qarqyndy túrde damyp, álemdik naryqqa shyǵatyn alańǵa aınalýy qajet. Bul – negizgi mindet.
Erzat Dýlat Higgsfield komandasynyń 95 paıyzy qazaqstandyqtardan quralǵanyn, bul jastardyń áleýetin tanytatynyn jetkizdi. Sonymen qatar ol AI-ındýstrııaǵa qajetti kadr daıarlaý jáne birlesken bilim berý bastamalaryn júzege asyrý isinde memleketpen seriktes bolýǵa daıyn ekenin rastady.
Murat Ábdirahmanov venchýrlik ındýstrııa memleketterdiń tehnologııalyq damýynyń tetigi sanalatynyna toqtaldy. Bul oraıda Qazaqstannyń jahandyq venchýrlik ındýstrııanyń tolyq qatysýshysy bolýǵa múmkindigi zor.
Eske sala keteıik, budan buryn Prezıdenttiń Qarjylyq monıtorıng agenttiginde jıyn ótkizgenin jazǵan edik.