Prezıdent Hanwha Group kompanııasyna Qazaqstanda birlesken jobalardy júzege asyrýdy usyndy
ASTANA. KAZINFORM – Prezıdent Qasym-Jomart Toqaev Hanwha Group vıtse-tóraǵasy Kım Don Vondy qabyldady, dep habarlaıdy Aqorda.
Kezdesýde qazaq-koreı ınvestıtsııalyq jáne tehnologııalyq yntymaqtastyǵynyń perspektıvti baǵyttary talqylandy.
Qasym-Jomart Toqaev Koreıamen strategııalyq seriktestikti joǵary baǵalaıtynyn jetkizdi.
Prezıdenttiń aıtýynsha, elimiz Hanwha Group kompanııasyn Koreıa Respýblıkasynyń birqatar strategııalyq mańyzdy salalarda halyqaralyq pozıtsııasy myǵym jetekshi bıznes toptarynyń biri retinde qarastyrady.
Memleket basshysy Qazaqstanda ulttyq jasandy ıntellekt ekojúıesin qalyptastyrý, tsıfrlyq ınfraqurylymdy damytý boıynsha aýqymdy sharalar qabyldanyp jatqanyn aıtty.
Prezıdent Hanwha Group kompanııasyna Qazaqstandy Ortalyq Azııa naryǵyna shyǵatyn tehnologııalyq alań retinde paıdalanyp, birlesken jobalardy júzege asyrýdy usyndy.
Qasym-Jomart Toqaev Qazaqstannyń Hanwha Group kompanııasymen seriktestikti keńeıtýge daıyn ekenin rastady jáne qol jetkizilgen ýaǵdalastyqtar ózara tıimdi naqty jobalarǵa ulasatynyna senim bildirdi.
Óz kezeginde Kım Don Von Hanwha Group 1997 jyly Qazaqstanmen yntymaqtastyqty bastaǵan alǵashqy koreıalyq korporatsııalardyń biri ekenine nazar aýdardy. Sondaı-aq elimizdegi tsıfrlandyrý úderisine jáne túrli jobalardy iske asyrýǵa qatysý múmkindigin erekshe yqylaspen qabyldaǵanyn atap ótti.
Aıta keteıik, keshe Qasym-Jomart Toqaev pen Pan Gı Mýn BUU reformasy týraly pikir almasty.
