Prezıdent: Halyqaralyq standartqa jáne ekologııalyq normalarǵa saı qoqys polıgonyn salý qajet

SEMEI. QazAqparat – Turǵyndardyń densaýlyǵy, turmysy qorshaǵan ortanyń jaǵdaıyna tikeleı baılanysty. Bul týraly Memleket basshysy Qasym-Jomart Toqaev Abaı oblysy jurtshylyǵymen kezdesýinde aıtty, dep habarlaıdy QazAqparat Aqordaǵa silteme jasap.

«Ekologııa máselesi. Bul sala árqashan ózekti, tipti, ulttyq qaýipsizdik máselesi desek bolady. Sebebi, turǵyndardyń densaýlyǵy, turmysy qorshaǵan ortanyń jaǵdaıyna tikeleı baılanysty. Sondyqtan, ekologııamen aınalysatyn arnaıy mınıstrlik qurý – meniń Prezıdent qyzmetindegi alǵashqy sheshimderimniń biri boldy.

«Birge – taza Qazaqstan» aktsııasy júzege asyrylyp jatyr. Bul – barsha halqymyzdy uıystyrǵan mańyzdy bastama. 2020 jyldan beri meniń tapsyrmam boıynsha elimizde eki mıllıard aǵash otyrǵyzý sharasy bastaldy. Jalpy, biz osy baǵytta áli de óte kóp jumys atqarýymyz kerek», - dedi Qasym-Jomart Toqaev.

Memleket basshysy h alyqaralyq standartqa jáne ekologııalyq normalarǵa saı keletin qoqys jınaıtyn jańa polıgon salýdy tapsyrdy.

«Bul jumys oblys ákiminiń jeke baqylaýynda bolýǵa tıis. Energetıka mınıstrligi Semeı ıadrolyq qaýipsizdik aımaǵy týraly zań jobasyn ázirledi. Bıylǵy sáýir aıynda bul jobany Májilis maquldady. Endi ony tezirek qabyldap, taza jerdi aýyl sharýashylyǵy úshin paıdalanýǵa berý kerek», - dedi Prezıdent.