Prezıdent «Halyqtyq qurylys» týraly: Táýelsiz Qazaqstan tarıhynda mundaı aýqymdy joba bolǵan emes
ASTANA. KAZINFORM – Keler jyly bastalatyn «Halyqtyq qurylys» baǵdarlamasy aıasynda óńirlerde myńdaǵan jumys orny ashylady. Otandyq kásipkerlerge mol múmkindikter beriledi. Táýelsiz Qazaqstannyń tól tarıhynda mundaı aýqymdy joba buryn-sońdy bolǵan emes. Bul pikirdi Prezıdent Qasym-Jomart Toqaev «Qazaq tili» qoǵamynyń H quryltaıynda aıtty.
– Barshańyzǵa málim, qazir elimizdiń aldynda mańyzdy mindetter tur. Bárimiz bir el bolyp «Halyqtyq qurylys» baǵdarlamasyn iske asyratyn boldyq. 2027 jyl «Jalpyhalyqtyq aýqymdy qurylys jyly» bolmaq. Qazaqstan úlken qurylys alańyna aınalady, – dep atap ótti Prezıdent.
Elimiz boıynsha ártúrli áleýmettik nysandar – balabaqshalar, mektepter, kitaphanalar, aýrýhanalar, emhanalar, ońaltý ortalyqtary, sport ınfraqurylymy jáne basqa da ǵımarattar, óndiris oryndary, joldar, vokzaldar, áýejaılar salynady.
– Barlyq óńirde myńdaǵan jumys orny ashylady. Otandyq kásipkerlerge mol múmkindikter beriledi. Táýelsiz Qazaqstannyń tól tarıhynda mundaı aýqymdy joba buryn-sońdy bolǵan emes. «Halyqtyq qurylys» – mazmuny keń, mán-maǵynasy tereń naǵyz halyqtyq joba. Biz el ıgiligine qyzmet etetin nysandar salyp, tutas memleketimizdiń kelbetin jańartamyz, búkil ultymyzdyń sana-sezimine serpin beremiz, – dedi Qasym-Jomart Toqaev.
Keshe Memleket basshysy elimizdiń áleýmettik-ekonomıkalyq ahýalyn arttyrýdyń jalǵyz joly – qurylys dep ataǵan edi.
