Prezıdent «Halyqtyq qurylys» baǵdarlamasyna bólinetin qarjyny baqylaıtyn komıssııa qurýdy usyndy
ASTANA. KAZINFORM – Memleket basshysy Qasym-Jomart Toqaev «Halyqtyq qurylys» baǵdarlamasyna bólinetin bıýdjet qarajatynyń jumsalýyn baqylaıtyn memlekettik komıssııa qurýdy usyndy. Bul týraly Prezıdent X áleýmettik jelisindegi paraqshasynda jazdy.
– 28 qazan kúni dástúrli Joldaýymda aıtqan «Halyqtyq qurylys» baǵdarlamasyn júzege asyrý barysynda bıýdjet qarajatynyń jumsalýyn baqylaıtyn memlekettik komıssııa qurý qajet dep sanaımyn. Komıssııa quramyna birqatar salalyq vedomstvo basshylary, Quryltaı men máslıhattar depýtattary, Halyq Keńesiniń músheleri, qoǵam qaıratkerleri, belsendiler, volonterler, jýrnalıster kiredi, - delingen Prezıdent jazbasynda.
Aıta keteıik, buǵan deıin Prezıdent Qasym-Jomart Toqaev «Halyqtyq qurylys» baǵdarlamasy aıasynda óńirlerde 70-ke jýyq densaýlyq saqtaý nysany men 50-ge jýyq bilim berý, sport jáne mádenıet mekemesiniń qurylysy bastalatynyn málimdegen edi.
Úkimetke jyl sońyna deıin naqty jobalardyń bastapqy tizimin ázirleý tapsyrylǵan.
