Prezıdent: elimizdiń jarqyn bolashaǵy — óskeleń urpaqtyń qolynda
ASTANA. KAZINFORM — Memleket basshysy Qasym-Jomart Toqaev Halyqaralyq jastar kúnine arnalǵan Jastar Fest forýmyna qatysýshylarǵa úndeý joldady. Bul týraly Aqorda málim etti.
Qurmetti jastar, forýmǵa qatysýshylar!
Qadirli qaýym!
Halyqaralyq jastar kúni barshańyzǵa qutty bolsyn!
Bul — mán-maǵynasy erekshe mereke. Búgin osynda naǵyz otanshyl, daryndy jáne janashyr jastar jınaldy. Túrli kásipti meńgergen azamattar bas qosyp otyr.
Halqymyz qashanda talapty jastardy qoldaǵan. «Aqyl — jastan» dep, olarǵa zor senim artqan.
Sizder barlyq salada belsendi túrde eńbek etip jatsyzdar. Volonter retinde muqtaj jandarǵa kómek berip júrsizder. Mańyzdy bastamalarǵa, ekologııalyq is-sharalarǵa atsalysyp, qoldaý kórsetip kelesizder. Sport, bilim saıystarynda top jaryp, eldiń abyroıyn kóterip júrsizder.
Osylaısha, Ádiletti, Taza ári Qýatty Qazaqstandy qurýǵa naqty úles qosyp jatsyzdar. Men barshańyzǵa shynaıy rızashylyǵymdy bildiremin!
Jastar forýmy Pavlodar qalasynda ótip jatyr. Bul aımaq — ult rýhanııatyn baıytýǵa ólsheýsiz eńbek sińirgen kórnekti tulǵalardyń mekeni. Sondaı-aq Pavlodar — elimizdegi ónerkásip ortalyǵynyń biri. Oblystyń ekonomıkamyzdy órkendetýge qosqan úlesi zor.
Aımaq turǵyndary óndiris, sharýashylyq jáne basqa da salada adal eńbek etýde. Elimizdi kórkeıtýge atsalysýda.
Jastarymyz olardan úlgi-ónege alyp, oblysty odan ári damytyp, jańa maqsattarǵa jetý úshin qyzmet etýi kerek.
Eńbekqorlyq pen bilimpazdyq, janashyrlyq pen jaýapkershilik — eń asyl qasıetter.
Bıyl — Qazaqstanda Jumysshy mamandyqtary jyly. Osyǵan oraı, biz aýqymdy sharalardy qolǵa aldyq. Elimizde eńbek adamyna árdaıym erekshe qurmet kórsetilýi kerek.
Muny óskeleń urpaqtyń sanasyna sińirý mańyzdy, sebebi, eńbek — árbir adamnyń ómiriniń tuǵyry, qozǵaýshy kúshi. Eńbeksiz eshqandaı damý, órkendeý bolmaıdy. Bul bastamanyń mán-mańyzy da — osynda.
Jastar qashanda jáne qaı kezde de ózgeristiń basy-qasynda júredi
Sizder dúnıe áp-sátte myń qubylatyn zamanda ómir súrip jatsyzdar. Jastardyń ózderin tanytýyna múmkindik mol.
Ozyq oıly jastardyń qoǵam ómirine belsene aralasýy, bilimpazdyǵy, eńbek etýge jáne ózin-ózi damytýǵa qushtarlyǵy qýantady. Óıtkeni elimizdiń búgini de, erteńi de — Sizder.
Otanymyzdyń taǵdyry belgili bir dárejede jas býynnyń kúsh-qýatyna, oı-pikirine, bilim-biligine, tabandylyǵy men patrıottyq qasıetterine baılanysty.
Memleket óskeleń urpaqqa tıisti jaǵdaı jasaıdy. Qazaqstanda bilim alý jáne eńbekpen qamtý múmkindikterin keńeıtýge, talanttardy shyńdaýǵa, jeńildikpen baspana satyp alýǵa, sondaı-aq jastar kásipkerligin qoldaýǵa baǵyttalǵan kóptegen baǵdarlama ázirlenip, iske qosylýda.
Bul ıgilikterdi 600 myńnan asa jas kórip otyr. Sondaı-aq olar arnaýly kvota arqyly Májilis pen máslıhat qyzmetine belsendi atsalysýǵa múmkindik aldy. Prezıdenttik jastar kadr rezervi músheleri de iskerlik qyrymen tanylyp, joǵary laýazymdarǵa taǵaıyndalyp jatyr. Aýyl men aýdan ákimderin tikeleı saılaý tásili kóptegen jastyń jergilikti atqarýshy bılik júıesine qyzmetke kelýine jol ashty.
Dúnıe júzinde jastarǵa arnalǵan osyndaı mazmundy baǵdarlamalar kóp emes. Memleketimiz strategııalyq mańyzy bar bul saıasatty mindetti túrde jalǵastyrady.
Elimizge jaýapkershilikten qashpaıtyn, aıanbaı eńbek etetin ári ózin udaıy jetildirip otyratyn jańashyl jastar qajet.
Hakim Abaı «Ózińe sen, ózińdi alyp shyǵar, eńbegiń men aqylyń eki jaqtap» dep beker aıtpaǵan. Uly oıshyldyń bul ósıeti búgin de — ózekti. Qazaqstan jastary — kózi ashyq, kókiregi oıaý, oıy ushqyr, jasampaz azamattar. Elimizdiń jarqyn bolashaǵy — óskeleń urpaqtyń qolynda.
Men Sizderge senemin!
Qasterli Otanymyz ósip-órkendeı bersin!
Joldaryńyz ashyq bolsyn!
Jastarymyz árqashan baqytty jáne tabysty bolsyn!
Eske sala keteıik, buǵan deıin Prezıdent Qasym-Jomart Toqaev Aqordada halyqaralyq pán olımpıadalary jeńimpazdarymen jáne júldegerlerimen kezdesip, marapattaǵan bolatyn.