Prezıdent Halyqaralyq jáne Azııa paralımpıada komıtetteriniń basshylaryn qabyldady
ASTANA. KAZINFORM — Qasym-Jomart Toqaev Aqordada Halyqaralyq paralımpıada komıtetiniń prezıdenti Endrıý Parsonspen jáne Azııa paralımpıada komıtetiniń prezıdenti Madjıd Rashedpen kezdesti, dep habarlaıdy Aqordanyń baspasóz qyzmeti.
Memleket basshysy paralımpıada qozǵalysynyń mańyzdy mıssııasyn joǵary baǵalap, elimiz osynaý izgi maqsatty qýattaıtynyn atap ótti.
Prezıdent otandyq paralımpıadashylardyń álemdik arenadaǵy tabystary Qazaqstannyń ınklıýzıvti, ornyqty jáne áleýmettik jaýapkershilik arqalaǵan memleket retindegi kelbetin qalyptastyrýǵa yqpal etetinin jetkizdi.
— Oraıly sátti paıdalanyp, búkil álemde, Azııa qurlyǵynda jáne Qazaqstanda paralımpıada qozǵalysyn ilgeriletý baǵytynda atqaryp jatqan jumystaryńyzǵa rızashylyǵymdy bildiremin. Sizdermen senimdi seriktes bolýǵa ázirmiz. Keleshekte qozǵalysty damytyp, nyǵaıtý maqsatynda birlesip kóp jumys isteıtinimizge kúmán joq, — dedi Prezıdent.
Endrıý Parsons pen Madjıd Rashed paralımpıada sportyna jáne Astanada Azııa paralımpıada komıteti Bas assambleıasynyń 8-shi sessııasyn uıymdastyrýǵa kórsetken qoldaýy úshin Qasym-Jomart Toqaevqa alǵys aıtty.
Olar Qazaqstanda paralımpıada qozǵalysy barshaǵa birdeı múmkindik qaǵıdaty aıasynda josparly ári dáıekti túrde damyp kele jatqanyna nazar aýdardy.
— Sońǵy jyldary biz eleýli progress pen eren tabystarǵa kýá boldyq. Parıjde ótken Paralımpıada oıyndarynda Qazaqstan keremet nátıje kórsetti. Sportshylaryńyz toǵyz medal jeńip aldy. Sonyń ishinde alǵash ret eki atlet altyn medalǵa ıe boldy. Qazaqstan sportshylary ózderine deıingi atletterdiń izin jalǵap, óskeleń urpaqty jigerlendirip keledi. Bul kezdeısoqtyq emes, júıeli jumys pen durys tańdalǵan baǵdardyń nátıjesi. Biz Qazaqstannyń paralımpıadalyq sport túrlerin damytý nıetin joǵary baǵalaımyz, — dedi Halyqaralyq paralımpıada komıtetiniń prezıdenti Endrıý Parsons.
Madjıd Rashed 2018 jyly Astanaǵa kelgenin, Qazaqstandaǵy parasportshylardyń jattyǵýyna jasalǵan qolaıly jaǵdaımen tanys ekenin aıtty.
— Delegatsııamyzǵa Astana unap jatyr. Bizdi jyly shyraımen qarsy aldy. Jergilikti halyqtyń keń peıiliniń arqasynda Qazaqstanda óz úıimizde júrgendeı sezinemiz, — dedi Azııa paralımpıada komıtetiniń prezıdenti.
Kezdesýde elimizde APC jáne IPC jarystaryn ótkizý máseleleri talqylandy. Sondaı-aq otandyq paralımpıadashylardyń bilim berý bastamalary men halyqaralyq baǵdarlamalarǵa qatysýy pysyqtaldy.
Búginde elimizde 19 paralımpıadalyq sport túri qarqyndy damyp keledi. Jyl saıyn túrli deńgeıdegi 800-den asa jarys ótkiziledi. Oǵan 10 myńnan artyq adam qatysady. Ulttyq qurama sapynda 1 myńnan astam sportshy bar.
Budan buryn Memleket basshysy Shymkent ákimin qabyldap, qalanyń damýyna qatysty naqty mindetter júktedi.