Prezıdent Halyqaralyq sot ákimshiligi qaýymdastyǵynyń prezıdenti Lýıs Palmany qabyldady
ASTANA. KAZINFORM – QR Sýdıalarynyń IX sezi alańynda Qasym-Jomart Toqaev Halyqaralyq sot ákimshiligi qaýymdastyǵynyń (IACA) prezıdenti Lýıs Palmamen kezdesti. Bul týraly Aqordanyń baspasóz qyzmeti málim etti.
Júzdesýde Qazaqstandaǵy sot reformasynyń ózekti máseleleri talqylandy. Prezıdent elimizde sot ákimshiliginiń jańa júıesi qurylǵannan keıin sottardyń derbestigi nyǵaıa túskenin atap ótti.
Qasym-Jomart Toqaev pen Lýıs Palma sot organdary arasyndaǵy tyǵyz yntymaqtastyqtyń, sot tóreligi júıesin jańǵyrtý salasynda tájirıbe almasýdyń jáne sot óndirisin tsıfrlandyrýdyń mańyzdy ekenine nazar aýdardy.
Memleket basshysy Qazaqstan Sot ákimshiliginiń IACA-men ózara yqpaldastyǵy atalǵan salany jańa deńgeıge kóterip, sapasyn arttyra túsetinine senim bildirdi.
Óz kezeginde Lýıs Palma Qazaqstannyń sot júıesin basqarý segmentindegi jańa ózgeristerdi joǵary baǵalap, Halyqaralyq sot ákimshiligi qaýymdastyǵynyń basqa músheleri bizdiń elimizdiń tájirıbesin zerdeleýi qajet ekenin aıtty.
