Prezıdent Halyqaralyq shańǵy sporty jáne snoýbord federatsııasynyń prezıdentin qabyldady
ASTANA. KAZINFORM – Memleket basshysy Halyqaralyq shańǵy sporty jáne snoýbord federatsııasynyń (FIS) prezıdenti Iohan Elıashty qabyldady. Bul týraly Aqorda málim etti.
Kezdesýde Qazaqstannyń Halyqaralyq shańǵy sporty federatsııasymen yntymaqtastyq perspektıvasy talqylandy.
— Qasym-Jomart Toqaev elimizde 85 myńnan asa adam shańǵy sportymen turaqty túrde shuǵyldanatynyn atap ótti. Sondaı-aq Qazaqstanda taý shańǵysy men shańǵy jarysy keshenderi, halyqaralyq deńgeıdegi muz arenalary sekildi zamanaýı ınfraqurylymdar bar. Memleket basshysy elimiz jaqynda Italııada ótetin Qysqy Olımpıada oıyndaryna tyńǵylyqty daıyndalyp jatqanyn jetkizdi, — delingen habarlamada.
FIS prezıdenti sportqa qoldaý kórsetkeni úshin Memleket basshysyna alǵys aıtyp, qazaqstandyqtar álemniń baıraqty básekelerinde laıyqty óner kórsetip júrgenine nazar aýdardy. Sondaı-aq ol Qazaqstanda júzege asyrylyp jatqan áleýmettik-ekonomıkalyq reformalarǵa joǵary baǵa berdi.
Qasym-Jomart Toqaev pen Iohan Elıash elimizdiń Halyqaralyq shańǵy sporty federatsııasymen tájirıbe almasý, sportshylardy daıarlaý, bapkerlerdi oqytý jáne tórelik etý baǵyttaryndaǵy yqpaldastyqty keńeıtý múmkindikterin qarastyrdy.
Prezıdent elimizde shańǵy jáne snoýbord sportynyń damýyna qosqan úlesi úshin Iohan Elıashty II dárejeli «Dostyq» ordenimen marapattady.
Aıta keteıik, buǵan deıin Prezıdent «QazaqGaz» UK» AQ basqarma tóraǵasy Álibek Jamaýovty qabyldady.