Prezıdent Halyqaralyq elektr baılanysy odaǵynyń bas hatshysyn qabyldady
ASTANA. KAZINFORM — Memleket basshysy Halyqaralyq elektr baılanysy odaǵynyń bas hatshysy Dorın Bogdan-Martındi qabyldady. Bul týraly Aqordanyń baspasóz qyzmeti habarlady.
Kezdesýde Qazaqstan men Halyqaralyq elektr baılanysy odaǵy arasynda tsıfrlyq jáne telekommýnıkatsııalyq tehnologııalar baǵytyndaǵy yntymaqtastyq perspektıvasy talqylandy.
Qasym-Jomart Toqaev Dorın Bogdan-Martındi Halyqaralyq elektr baılanysy odaǵynyń 160 jyldyǵymen quttyqtap, uıym tsıfrlyq tehnologııalar salasyndaǵy jahandyq yntymaqtastyqta mańyzdy ról atqaratynyn aıtty.
Prezıdent zamanaýı tsıfrlyq ekojúıe men damyǵan ınfraqurylym qalyptastyrý máselesine aıryqsha mán berdi. Osy oraıda Qazaqstannyń OneWeb, Starlink, Amazon Kuiper jáne Shanghai Spacecom Satellite Technology sııaqty tómen orbıtaly jer serikteri júıesi jobalaryna belsendi túrde qatysatynyn atap ótti.
Bas hatshy Dorın Bogdan-Martın elimizdiń tsıfrlyq ındýstrııany damytýǵa jáne jasandy ıntellekt tehnologııalaryn engizýge baǵyttalǵan kúsh-jigerine joǵary baǵa berdi. Sondaı-aq Halyqaralyq elektr baılanysy odaǵynyń Qazaqstanmen seriktestikti odan ári tereńdetýge jáne birlesken bastamalardy keńeıtýge daıyn ekenin jetkizdi.
Aıta ketelik Memleket basshysy OPEK bas hatshysy Haıtam ál-Gaısty qabyldaǵan edi.