Prezıdent Halyqaralyq dzıýdo federatsııasynyń prezıdenti Marıýs Vızerdi qabyldady
ASTANA. KAZINFORM - Memleket basshysy Halyqaralyq dzıýdo federatsııasynyń (IJF) prezıdenti Marıýs Vızerdi qabyldady, dep habarlaıdy Aqordanyń baspasóz qyzmeti.
Qasym-Jomart Toqaev Marıýs Vızerge dzıýdony damytýǵa jáne nasıhattaýǵa úles qosqany úshin rızashylyq bildirdi. Prezıdenttiń aıtýynsha, Qazaqstanda sporttyń osy túrine qyzyǵýshylyq zor. Ásirese, balalar men jastar arasynda tanymaldylyqqa ıe.
– Sizdiń saparyńyz Qazaqstan men Halyqaralyq dzıýdo federatsııasy arasyndaǵy ózara yqpaldastyqqa tyń serpin berý turǵysynan óte mańyzdy dep sanaımyn. Búginde dzıýdonyń álemdik sport qoǵamdastyǵynda alatyn orny zor. Dzıýdo Qazaqstanda da óte tanymal sport túri. Elimizde kóptegen sektsııa men jattyǵý ortalyqtary jumys isteıdi. Onda 160 myńnan asa adam, solardyń ishinde balalar da jattyǵady. Jaqynda ótken Parıj Olımpıadasynda Eldos Smetovtiń jeńimpaz atanǵanyn maqtan tutamyz. Sondyqtan biz Halyqaralyq dzıýdo federatsııasymen qarym-qatynasty órkendetip, yntymaqtastyqty jandandyrýǵa nıettimiz, – dedi Memleket basshysy.
Marıýs Vızer Qazaqstanda dzıýdony damytýǵa qoldaý kórsetkeni úshin Qasym-Jomart Toqaevqa alǵys aıtty.
– Qazaqstanǵa kelý – men úshin úlken mártebe. Sizge jáne elińizge dzıýdoǵa ǵana emes, áleýmettik ıntegratsııanyń jáne beıbitshiliktiń birden-bir tetigi sanalatyn sporttyq qozǵalysqa qoldaý kórsetkenińizge rızashylyǵymdy bildiremin. Dzıýdo qaýymdastyǵynyń barlyq múshesi ortaq maqsatqa jumylady. Bul – qoǵamda laıyqty orny bar azamat tárbıeleý, – dedi Marıýs Vızer.
Ol Astanada Halyqaralyq dzıýdo federatsııasynyń uıytqy bolýymen IJF akademııasyn ashý josparlanyp otyrǵanyn jetkizdi. Bul aımaqtaǵy joǵary sanatty jattyqtyrýshylar men tóreshilerdi daıarlaıtyn ortalyqtardyń biri bolmaq.
Qasym-Jomart Toqaev pen Marıýs Vızer Qazaqstannyń Halyqaralyq dzıýdo federatsııasymen uzaqmerzimdi yntymaqtastyǵynyń perspektıvasy jóninde pikir almasty. Budan bólek, 2027 jyly elimizde ótetin dzıýdodan Álem chempıonatyna daıyndyq máselelerin pysyqtady.
Kezdesý sońynda Memleket basshysy Qazaqstanda dzıýdony ilgeriletýge qosqan úlesi úshin Marıýs Vızerdi ІІ dárejeli «Dostyq» ordenimen marapattady.
Osyǵan deıin Qazaqstanǵa resmı saparmen kelgen Halyqaralyq dzıýdo federatsııasynyń (IJF) prezıdenti Marıýs Vızer elordadaǵy sport nysandaryn aralap, jumys barysymen tanysqanyn jazdyq.
