Prezıdent Halyqaralyq azamattyq avıatsııa týraly konventsııaǵa qatysty zańǵa qol qoıdy
ASTANA. KAZINFORM – Bul týraly Aqordanyń baspasóz qyzmeti habarlady.
-Memleket basshysy «Halyqaralyq azamattyq avıatsııa týraly konventsııanyń 50 a)-babyn ózgertýge qatysty hattamany jáne Halyqaralyq azamattyq avıatsııa týraly konventsııanyń 56-babyn ózgertýge qatysty hattamany ratıfıkatsııalaý týraly» Qazaqstan Respýblıkasynyń Zańyna qol qoıdy,-delingen habarlamada.
Zańnyń mátini baspasózde jarııalanady.
QR Kólik mınıstrliginiń habarlaýynsha, ózgerister IKAO Keńesiniń quramyn 36-dan 40 múshe memleketke deıin ulǵaıtýdy qarastyrady.
Túzetýlerdiń kúshine enýi úshin olardy IKAO-ǵa múshe memleketterdiń keminde úshten ekisi (128 el) ratıfıkatsııalaýy qajet. Búgingi tańda 123-ten astam memleket ratıfıkatsııalaý rásimin aıaqtady.
Atalǵan Zańnyń qabyldanýymen Qazaqstan Ortalyq Azııada Chıkago konventsııasyna engizilgen bul ózgeristerdi ratıfıkatsııalaǵan alǵashqy memleketterdiń birine aınaldy.
Bul qadam elimizdiń halyqaralyq mindettemelerge, sondaı-aq tıimdi basqarýdy damytý men halyqaralyq yntymaqtastyqty kúsheıtýge baǵyttalǵan Chıkago konventsııasynyń maqsattary men qaǵıdattaryna beıildiligin rastaıdy.
Sonymen qatar, Zańǵa qol qoıylýy Qazaqstanǵa ushý qaýipsizdigi salasyndaǵy halyqaralyq standarttardy jáne avıatsııalyq saıasatty qalyptastyrýǵa qatysýǵa múmkindik beredi, sondaı-aq aldaǵy IKAO Assambleıasynyń Tótenshe sessııasy aıasynda IKAO Keńesine óz kandıdatýrasyn usyný nıetin bekitedi.
Osyǵan deıin Memleket basshysy QR Úkimeti men HQDB arasyndaǵy kelisimge qatysty qujatqa qol qoıdy.
