Prezıdent Halyq Keńesiniń tóraǵasy laýazymyna Erlan Qoshanovtyń kandıdatýrasyn usyndy
ASTANA. KAZINFORM — Elordada Prezıdenttik ortalyqta Qazaqstan Halyq Keńesiniń uıymdastyrýshylyq otyrysy bastaldy. Jıynda Memleket basshysy Qasym-Jomart Toqaev Qazaqstan Halyq Keńesi tóraǵasy qyzmetine kandıdatýra jónindegi usynysyn jarııalady.
«Qazaqstan Halyq keńesi týraly» Konstıtýtsııalyq zańnyń 8-babyna sáıkes, Memleket basshysy Qazaqstan Halyq keńesiniń tóraǵasy laýazymyna kandıdatýrany usynady.
— Osyǵan oraı, Keńes tóraǵasynyń kandıdatýrasy boıynsha ózderińizben aqyldasý qajet. Bul — konstıtýtsııalyq mártebesi bar, bedeldi laýazym. Sondyqtan bul laýazymǵa elge belgili, halyq pen bıliktiń arasynda dáneker bolatyn azamat kelýge tıis dep sanaımyn. Osynyń barlyǵyn eskere otyryp, men Erlan Jaqanuly Qoshanovtyń kandıdatýrasyn usynamyn, — dedi Qasym-Jomart Toqaev.
Prezıdent ózi usynǵan E. Qoshanovtyń jaýapkershiligi joǵary, bilikti, tájirıbesi mol tulǵa ekenin atap ótti. Ol memlekettik qyzmet júıesinde uzaq jyldar eńbek etip, bul jumysty abyroımen atqardy. Májilis tóraǵasy retinde aýqymdy reformalardy iske asyrýǵa belsene atsalysty.
— Endi Halyq keńesiniń tóraǵasy retinde tabysty jumys istep, qoǵamdyq kelisimdi nyǵaıtýǵa zor úles qosatynyna kúmánim joq. Sondyqtan Erlan Jaqanuly Qoshanovtyń kandıdatýrasyna muqııat nazar aýdaryp, qoldaısyzdar dep senemin.
Jalpy, Qazaqstan Halyq keńesiniń aldynda turǵan mindet óte kóp. Erteń Halyq keńesiniń negizgi otyrysynda aldaǵy mańyzdy mindetterine keńirek toqtalamyn. Al qazir osy másele boıynsha kóp sóz aıtsam, qısynsyz bolar. Jumystaryńyz tabysty bolsyn!, — dedi Memleket basshysy.
Budan bólek, otyrysta Qazaqstan Halyq Keńesiniń tóraǵasynyń orynbasarlaryn taǵaıyndaý jáne Halyq Keńesi Tóralqasyn qalyptastyrý máseleleri qaralady.
Sondaı-aq turaqty komıtetterdiń sany men ataýy, olardyń tóraǵalary men quramdary jarııalanyp, Halyq Keńesiniń jumys jospary jáne Ádep jónindegi komıssııanyń quramy bekitiledi.
Eske sala ketsek, jyl basynda Prezıdent Qasym-Jomart Toqaev Qyzylordadaǵy V Ulttyq quryltaıda Halyq keńesi ınstıtýtynyń zańdyq mártebesi qandaı bolatynyn aıtyp berdi.
Keshe Prezıdent Qasym-Jomart Toqaev Qazaqstan Halyq Keńesiniń 126 adamnan turatyn quramyn bekitti. Onda etnomádenı birlestikterden — 42, qoǵamdyq birlestikterden — 42, máslıhattar men óńirlik qoǵamdyq keńesterden — 42 ókil bar.
Qazaqstan Halyq Keńesiniń birinshi sessııasy 23-24 qyrkúıek kúnderi ótedi.
