Prezıdent Halyq Keńesi múshelerine: Máseleni kótere otyryp, sheshimin de usyný qajet

— Qazaqstan Halyq Keńesi — balamasy joq, múlde jańa, ınnovatsııalyq ınstıtýt. Ádiletti Qazaqstannyń jarqyn sımvoly sanalatyn bul qurylymnyń jóni de, joly da ózgeshe. Sondyqtan, Keńestiń alǵashqy múshelerine zor jaýapkershilik júkteledi. Osy mártebeli ári bedeldi qurylymnyń tabysty jumysy sizderdiń tabandy eńbekterińizge baılanysty bolmaq. Sizder qoǵamnyń memleketke degen senimin nyǵaıtyp, el birligin kúsheıtýge jol ashatyn ıgi isterdiń bastaýynda bolasyzdar. Árıne, jol bastaý ońaı bolmasy anyq. Biraq bir jaǵynan, bul — úlken qurmet jáne zor múmkindik. Sizder, halyqpen etene baılanys ornatyp, jasampaz bastamalar kóterý arqyly memlekettik basqarý júıesine, tipti, el taǵdyryna yqpal ete alasyzdar. Eń bastysy, ult múddesi bárinen bıik turýǵa tıis, — dedi Qasym-Jomart Toqaev.

Osy tusta Memleket basshysy Keńes músheleriniń nazaryn taǵy bir máselege aıryqsha aýdartty.

— Sizder árdaıym halyqpen tikeleı baılanysta bolýlaryńyz kerek. Qıyndyqtan taısalmaı, kúrdeli máselelerdi batyl kóterý qajet. Jurtty alańdatqan máselelerdi tereń zerttep, qoǵamdyq talqylardyń bel ortasynda júrý mańyzdy. «Halyq únine qulaq asatyn memleket» tuǵyrnamasy osyndaı ashyq dıalog arqyly júzege asady. Qoǵamdyq senimdi kúsheıtýdiń, ıaǵnı ulttyq biregeılikti nyǵaıtýdyń budan basqa joly joq. Sondyqtan, ár máselege tyńǵylyqty daıyndyqpen kirisý qajet. Halqymyz «Syn túzelmeı, min túzelmeıdi» dep beker aıtpaǵan. Biraq, basty talap: kez kelgen syn shynaıy bolýǵa tıis. Máseleni kótere otyryp, onyń sheshimin de qatar usyný qajet. Keńestiń ár múshesi qarapaıym etıka normalaryn qatań ustanýy kerek. Halyq Keńesi ókilderi joǵary saıası mádenıettiń ozyq úlgisin kórsetýge tıis, — dedi Prezıdent.

Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.