Prezıdent «Habar» agenttigin 30 jyldyq mereıtoıymen quttyqtady
ASTANA. KAZINFORM — Respýblıka kúni qarsańynda Qazmedıa ortalyǵynda «Habar» agenttiginiń 30 jyldyq mereıtoıyna arnalǵan is-shara ótti, dep habarlaıdy Mádenıet jáne aqparat mınıstrliginiń baspasóz qyzmeti.
Saltanatty jıynǵa QR Prezıdentiniń ishki saıasat jáne kommýnıkatsııalar máseleleri jónindegi kómekshisi Arman Qyryqbaev, QR Mádenıet jáne aqparat mınıstri Aıda Balaeva, sondaı-aq Parlament depýtattary, televızııa ardagerleri men medıaholdıng qyzmetkerleri qatysty.
Aqparat keńistiginde aıryqsha orny bar agenttikti Memleket basshysy Qasym-Jomart Toqaev mereıtoıymen quttyqtady. Prezıdenttiń quttyqtaý hatyn Arman Qyryqbaev oqyp berdi.
«Habarda» televızııa salasy qyzmetkerleriniń tutas shoǵyry qalyptasty. Kóptegen jýrnalıst osynda jemisti jumys istep, sheberlik mektebinen ótti. Agenttik árdaıym sabaqtastyq dástúrin saqtap, myqty mamandardyń ustahanasy retinde tanyldy.
Aqparat maıtalmandary ujymy elimizdegi jáne álemdegi oqıǵalar quraly shynaıy habar taratyp, halyqqa memlekettik saıasattyn mán-mańyzyn túsindirýge zor úles qosyp keledi. Sizder bolashaqta da qoǵamdaǵy ózekti máselelerdi batyl kóterip, el ıgiligin eseleý jolynda aıanbaı eńbek etersizder dep bilemin», – delingen quttyqtaý hatta.
Sonymen qatar, QR Parlamenti Senatynyń Tóraǵasy Máýlen Áshimbaev pen Parlament Májilisiniń Tóraǵasy Erlan Qoshanov «Habar» ujymyna beınequttyqtaý joldady.
QR Mádenıet jáne aqparat mınıstri Aıda Balaeva da jyly lebizin bildirip, «Habar» agenttigi táýelsiz Qazaqstannyń tarıhyn taspalaǵan irgeli medıauıym ekenin atap ótti.
— Qazirgi kezde «Habar» telearnasy El Prezıdentiniń joldaýlaryn, reformalary men bastamalaryn halyqqa keńinen túsindirip, olardyń mán-mańyzyn jetkizýde erekshe ról atqaryp keledi. «Zań jáne tártip», «Adal azamat», «Ádiletti Qazaqstan», «Taza Qazaqstan» sekildi eldiń bolashaǵyna baǵyttalǵan tujyrymdamalardy aqparattyq keńistikte júıeli túrde nasıhattap, qoǵamda jaýapkershilik pen ádildik qaǵıdattaryn ornyqtyrýǵa zor úles qosýda», — dedi mınıstr.
Іs-shara barysynda Sergeı Ponomarev, Bıbigúl Jeksenbaı, Qymbat Dosjan, Erlan Bekhojın, Qymbat Hangeldına, Zeıin Álipbek, Marat Muhamedsalıev jáne Svetlana Kokovınets sekildi otandyq televızııa maıtalmandary ózderi túlep ushqan «qara shańyraqqa» rızashylyǵyn bildirdi.
Sondaı-aq «Qazmedıa ortalyǵynyń» foıesinde Habardyń 30 jyldyǵyna arnalǵan foto-kórme uıymdastyryldy. Tájirıbeli jýrnalıster elimizdiń jetekshi joǵary oqý oryndarynyń stýdentterine dáris berip, sheberlik sabaqtaryn ótkizdi.
«Habar» agenttigi 1995 jylǵy 23 qazanda quryldy. Qazirgi kezde agenttik quramynda qazaq jáne orys tilderinde habar taratatyn eki telearna bar. Biri – agenttiktiń basty arnasy — «Habar» jáne táýlik boıy habar taratatyn «24KZ» aqparattyq arnasy.
Atalǵan telearnalar eldegi barlyq aımaq kórermenderine qoljetimdi. Efırde ózekti jańalyqtar, kórkem jáne derekti fılmder, teleserıaldar men túrli baǵdarlamalar kórsetiledi. Táýliktik efır ýaqytynyń keminde 60 paıyzy memlekettik tilde taratylady.
Qazaqstannyń barlyq óńirlerinde jáne shetelderde «Habar» agenttiginiń tilshiler jelisi bar. Agenttiktiń ókildikteri AQSh-ta, BAÁ-de, Reseıde, Belgııada, Ulybrıtanııada, Ońtústik Koreıada, Qytaıda, Germanııada, Ózbekstanda, Qyrǵyzstanda, Frantsııada, Túrkııada, Grýzııada, Ispanııada jáne Malaızııada jumys isteıdi.
Osydan buryn elorda tarıhynyń jylnamasyna aınalǵan qos basylymǵa 35 jyl tolǵanyn jazǵanbyz.