Prezıdent Gýrbangýly Berdimuhamedovpen telefon arqyly sóılesti

ASTANA.KAZINFORM — Memleket basshysy Túrikmenstan Halk Maslahatynyń Tóraǵasy Gýrbangýly Berdimuhamedovpen telefon arqyly sóılesti. Bul týraly Aqorda málim etti. 

Áńgimelesý barysynda Qasym-Jomart Toqaev pen Gýrbangýly Berdimuhamedov eki eldiń strategııalyq seriktestigin odan ári nyǵaıtý máselelerin talqylady.

Prezıdent baýyrlas halyqtyń Ult kóshbasshysyn Túrikmenstannyń bastamasymen BUU Bas Assambleıasy jarııalaǵan Halyqaralyq beıbitshilik jáne senim jylynyń bastalýymen quttyqtady.

Memleket basshysy qazirgideı jahandyq syn-qaterler kezeńinde Ashhabadtyń beıbitshilik pen bitimgerlikke úndegen bastamasynyń erekshe mańyzyn atap ótip, ony tabysty júzege asyrý úshin Qazaqstannyń jan-jaqty qoldaý kórsetýge daıyn ekenin aıtty.

Gýrbangýly Berdimuhamedov Halyqaralyq beıbitshilik jáne senim jylynyń aıasynda óńirlik jáne halyqaralyq deńgeıdegi yntymaqtastyq pen damýdy qamtamasyz etýge baǵyttalǵan Túrikmenstan tujyrymdamasynyń negizgi basymdyqtary jóninde málimet berdi.

Qasym-Jomart Toqaev pen Gýrbangýly Berdimuhamedov qazaq-túrikmen qatynastarynyń deńgeıi joǵary ekenine nazar aýdaryp, energetıka, kólik-tranzıt, mádenı-gýmanıtarlyq salalardaǵy buǵan deıin qol jetkizilgen ýaǵdalastyqtardy júzege asyrý barysyn egjeı-tegjeıli qarastyrdy.

Áńgimelesý barysynda óńirlik yqpaldastyq máselelerine jáne aldaǵy ýaqytqa josparlanǵan besjaqty formattaǵy is-sharalarǵa aıryqsha mán berildi.

Eske sala keteıik, buǵan deıin Memleket basshysy Túrkııa Prezıdentine kóńil aıtý jedelhatyn joldaǵanyn jazǵan bolatynbyz.