Prezıdent Gonkongpen quqyqtyq kómek týraly kelisim jobasyn bekitti

ASTANA. KAZINFORM — Qasym-Jomart Toqaev Qazaqstan men Qytaı Halyq Respýblıkasynyń Gonkong arnaýly ákimshilik aýdany arasyndaǵy qylmystyq ister boıynsha ózara quqyqtyq kómek týraly kelisimniń jobasyn maquldady. 

Atap aıtqanda, «Qazaqstan Respýblıkasynyń halyqaralyq sharttary týraly» Zańynyń 8-baby 1) tarmaqshasyna sáıkes Memleket basshysy tıisti Jarlyqqa qol qoıdy.

— Qosa berilip otyrǵan Qazaqstan Respýblıkasy men Qytaı Halyq Respýblıkasynyń Gonkong arnaýly ákimshilik aýdany arasyndaǵy qylmystyq ister boıynsha ózara quqyqtyq kómek týraly kelisimniń jobasy maquldansyn, — delingen Prezıdent Jarlyǵynda.

Qujatqa sáıkes, Qazaqstan Respýblıkasynyń Bas Prokýrory Berik Noǵaıuly Asylovqa kelisimge qaǵıdattyq sıpaty joq ózgerister men tolyqtyrýlar engize otyryp, Qazaqstan Respýblıkasynyń atynan qol qoıýǵa ókilettik berildi.

Kelisim jobasy qylmystyq ister boıynsha tergep-tekserý, qýdalaý jáne sot talqylaýy barysynda ózara quqyqtyq kómek kórsetý tártibin aıqyndaıdy. Atap aıtqanda, qujattar tabys etý, dáleldemeler alý, adamdardy shaqyrý jáne ýaqytsha berý, múlikti izdestirý men tárkileý, qylmystyq jolmen alynǵan kiristerdi qaıtarý tetikteri kózdelgen.

Jarlyq qol qoıylǵan kúninen bastap qoldanysqa engiziledi.

Buǵan deıin Prezıdent tsıfrlandyrýdyń keıbir máseleleri týraly Jarlyqqa qol qoıdy.

Sonymen qatar Úkimettiń keńeıtilgen otyrysynda Memleket basshysy Qasym-Jomart Toqaev quzyrly organdar «Ekonomıkany yryqtandyrý sharalary týraly» Jarlyqta kórsetilgen tapsyrmalarǵa atústi qaraıdy degen edi.