Prezıdent Gonkong Arnaýly ákimshilik aýdany Ákimshiliginiń Basshysy Djon Lımen kezdesti
ASTANA. KAZINFORM – Qasym-Jomart Toqaev mártebeli meımanǵa iltıpat bildirip, Qytaı Halyq Respýblıkasy Gonkong Arnaýly ákimshilik aýdany Ákimshiliginiń Basshysy Qazaqstanǵa alǵash ret kelip otyrǵandyqtan bul sapardyń mańyzy aıryqsha ekenin aıtty. Bul týraly Aqorda habarlady.
– Bul ýaqıǵa Qazaqstan men Gonkong, keńinen alyp qaraǵanda, máńgi jan-jaqty strategııalyq seriktestik baılanystyratyn Qazaqstan men Qytaı arasyndaǵy yntymaqtastyqty damytýǵa tyń serpin beretini sózsiz. Elderimizdiń arasynda joǵary deńgeıdegi saıası dıalog ornaǵan, saýda-ekonomıkalyq jáne ınvestıtsııalyq yqpaldastyq qarqyndy damyp keledi. Gonkongpen qarym-qatynasymyz týraly da dál osylaı aıtýǵa bolady, – dedi Qasym-Jomart Toqaev.
Memleket basshysy ınvestıtsııa, ınnovatsııa, tehnologııa jáne halyqaralyq saýda salalarynda áleýeti zor Gonkong álemde jetekshi qarjy jáne iskerlik ortalyqtardyń biri retinde erekshe ról atqaratynyn atap ótti.
Prezıdent bul sapar ózara tıimdi yntymaqtastyqty nyǵaıtýǵa, iskerlik qarym-qatynasty keńeıtýge jáne ınvestıtsııa, qarjy, tsıfrlandyrý, jasandy ıntellekt, kólik-logıstıka baǵyttarynda birlesken perspektıvti jobalardy júzege asyrýǵa jol ashatynyna senimdi ekenin jetkizdi.
Sondaı-aq Qasym-Jomart Toqaev Qazaqstanǵa salmaqty bıznes-delegatsııamen birge kelgeni úshin mártebeli meımanǵa rızashylyǵyn bildirdi. Bul Gonkong iskerlik qaýymdastyǵynyń elimizben yntymaqtastyqty arttyrýǵa úlken qyzyǵýshylyq tanytyp otyrǵanyn baıqatady.
Djon Lı qonaqjaılyq kórsetkeni úshin Prezıdentke alǵys aıtyp, Gonkongtyń Qazaqstanmen keshendi yqpaldastyqty odan ári tereńdetýge daıyn ekenin rastady.
– Atalǵan saparǵa erekshe mán beremin. Menimen shetelge shyqqan delegatsııalardyń eń aýqymdysy osy boldy. Onyń quramyna logıstıka, «jasyl» energetıka, taý-ken ónerkásibi, ınnovatsııa men tehnologııa jáne bilim berý sııaqty basty salalarda eńbek etetin 75 resmı tulǵa men kásipker endi, – dedi Djon Lı.
Gonkong Ákimshiliginiń Basshysy QHR Tóraǵasy Sı Tszınpınniń Qazaqstanda kóterilgen «Bir beldeý, bir jol» bastamasy eki el arasyndaǵy berik ári dostyq baılanystardyń jarqyn kórinisine aınalǵanyna toqtaldy.
Onyń aıtýynsha, Qytaı Halyq Respýblıkasynyń arnaýly ákimshilik aýdany sanalatyn Gonkong atalǵan bastamany ilgeriletýge belsendi túrde atsalysyp keledi. Sonymen qatar óńiraralyq baılanystardyń keńeıýi qalaǵa eleýli artyqshylyq beredi.
Qasym-Jomart Toqaev pen Djon Lı ekijaqty kún tártibindegi birqatar naqty máseleni talqylap, saýda-ekonomıkalyq yntymaqtastyqty odan ári jandandyrýǵa ózara múddeli ekenin rastady.
