Prezıdent Germanııanyń ekonomıkalyq qaýymdastyqtary men qarjy ınstıtýttary jetekshilerimen kezdesti
ASTANA. KAZINFORM - Memleket basshysynyń Germanııa Federatıvtik Respýblıkasyna resmı saparynyń alǵashqy kúni atalǵan eldiń jetekshi iskerlik qaýymdastyqtary men qarjy ınstıtýttarynyń basshylarymen kezdesýden bastaldy, dep habarlaıdy Aqordanyń baspasóz qyzmeti.
Qasym-Jomart Toqaev jıynǵa qatysýshylarmen Germanııa qarjysyn, tájirıbesi men táýekeldi basqarý tetikterin Qazaqstannyń resýrsymen jáne kólik salasyndaǵy múmkindikterimen ushtastyrý máselesin talqylady.
Prezıdent elimiz Germanııanyń Ortalyq Azııadaǵy jáne Eýrazııa keńistigindegi senimdi seriktesi bolýǵa umtylatynyn málimdedi.
– Halqymyz Germanııaǵa aıryqsha qurmetpen qaraıtynyn, abyroı-bedeli joǵary memleket dep biletinin atap aıtqym keledi. Bank sektoryndaǵy temirdeı tártipke, ınjenerlik sheshimderdiń joǵary sapasyna, shaǵyn jáne orta bıznestiń ornyqtylyǵyna (Mittelstand) tántimiz. Ekonomıkamyzdy jańǵyrtý men tehnologııalyq turǵydan transformatsııalaý úderisinde dál osy erekshelikterdi úlgi tutamyz. GFR – Eýropadaǵy basty seriktesterimizdiń biri. Elimizdiń eń iri saýda-ınvestıtsııalyq seriktesi – Eýropalyq odaqpen yqpaldastyqta qazaq-german yntymaqtastyǵynyń mańyzy zor. Biz úlken joldy eńserdik. Áıtse de ekonomıkalyq baılanysymyzdyń áleýeti munymen túgesilmeıdi. Qazaqstan ony jańa sapaly deńgeıge kóterýge daıyn, – dedi Memleket basshysy.
Prezıdent kezdesýge qatysýshylarǵa jaqynda S&P agenttigi Qazaqstannyń derbes reıtıngin «turaqty» degen boljammen BBB deńgeıine kótergenin jetkizdi. Fitch agenttigi de osyndaı baǵa berdi.
Memleket basshysy sońǵy on jylda elimiz óńirdegi eń ozyq tsıfrlyq jáne qarjylyq ekojúıeni qurǵanyna nazar aýdardy.
– Ekonomıkamyzdy qarjylandyrýǵa damý ınstıtýttary belsendi atsalysýda. Ótken jyly olar 20 mıllıard dollar kóleminde qarajat bóldi. Qazaqstan damý banki uzaq jyldar boıy nemis qarjy ınstıtýttarynyń qoldaýymen ónerkásip, energetıka, kólik ınfraqurylymy salalarynda mańyzdy jobalardy iske asyryp keledi. Bul maqsatqa Deutsche Bank, Helaba, LBBW, Commerzbank, KfW jáne basqa da uıymdardan 1,2 mıllıard dollar qarjy tartyldy, – dedi Memleket basshysy.
