Prezıdent: Germanııa halyqaralyq arenada bedeldi memleket
ASTANA. KAZINFORM — Qazaqstan Prezıdenti Qasym-Jomart Toqaev bul týraly Berlınde ótken baspasóz máslıhatynda aıtty, dep habarlaıdy Kazinform.
Dilnaz Erlanova, Jibek Joly telearnasy:
– Kelesi jyly Germanııa men Qazaqstan arasyndaǵy qarym-qatynastyń ornaǵanyna 35 jyl bolady. Qurmetti Prezıdent, júrip ótken jolymyzdy jáne memleketaralyq qatynastardy damytýdyń perspektıvalaryn qalaı baǵalaısyz?
Qazaqstan Prezıdenti Qasym-Jomart Toqaev:
– Biz júrip ótken joldy jetkilikti joǵary baǵalaımyz. Belgili bolǵandaı, joldy júrgen adam eńseredi. Biz jetkilikti qıyn joldan óttik, úlken jetistikterge jettik. Germanııa, ózderińiz biletindeı, bizdiń elimizde úlken qurmetke ıe. Biz bul eldi jaqsy kóremiz jáne qurmetteımiz, onyń jetistikterin, eń aldymen ekonomıkadaǵy, sondaı-aq basqa da salalardaǵy jetistikterin laıyqty baǵalaımyz.
Germanııa – halyqaralyq arenada óte bedeldi memleket. Sondyqtan men bul elge úlken úmitpen, jańa kelisimderge qol jetkizý maqsatynda zor senimmen keldim. Biz bul kelisimderge qol jetkizdik, endigi mindet – olardy tıisti deńgeıde júzege asyrý jáne oryndaý.
Sondyqtan bolashaqqa kózqarasym jetkilikti túrde oń. Biz budan da úlken jetistikterge jetetinimizge tolyq senimdimin. Óıtkeni eki tarapta da osyndaı jetistikke jetýge degen nıet bar.
Kelissózder barysynda men kantsler Mertsti kelesi jyly ózine yńǵaıly kez kelgen ýaqytta Qazaqstanǵa memlekettik saparmen kelýge shaqyrǵanymdy aıttym. Biz bul saparǵa daıyndalatyn bolamyz. Óıtkeni saparlar jaı ǵana baryp-qaıtý úshin emes, jańa ýaǵdalastyqtarǵa qol jetkizý jáne eń kúrdeli máseleler boıynsha ózara túsinistikke kelý úshin jasalady.
Prezıdent Shtaınmaıerdiń sapary jáne Germanııanyń qurmetti kantslerimen júrgizilgen kelissózder barysynda osyndaı ózara túsinistikke qol jetkizildi.
Osy jerde kórsetilgen qonaqjaılyq úshin alǵys bildiremin. Meniń barlyq úmitim aqtaldy. Biz, árıne, budan ári de osy uly el – Germanııamen qarym-qatynasty, yntymaqtastyqty damytý baǵytynda jumys isteıtin bolamyz.
Aıta ketelik Qasym-Jomart Toqaev pen Frank-Valter Shtaınmaıer Birlesken deklaratsııa qabyldaǵan edi.
