Prezıdent fýtbol klýbtaryn jekeshelendirýdi jedeldetý qajettigin aıtty
ASTANA. KAZINFORM — Memleket basshysy Týrızm jáne sport mınıstri Erbol Myrzabosynovty qabyldady.
Qasym-Jomart Toqaevqa sport salasyn keshendi reformalaýǵa qatysty buǵan deıin bergen tapsyrmalarynyń oryndalý barysy baıandaldy.
Erbol Myrzabosynov balalar men jasóspirimder sportyn qoldaý, halyqaralyq yntymaqtastyqty arttyrý, sportqa ǵylymı tásilderdi engizý, bıýdjet qarajatyn ońtaılandyrý jáne zańnamalyq bazany jetildirý jóninde esep berdi.
Sonymen birge sport salasynda vertıkaldi basqarý júıesin qalyptastyrý jumysy qarqyndy júrgizilip jatqanyn aıtty.
Salanyń jaǵdaıyna keshendi taldaý júrgizilgennen keıin birqatar oblysta sport basqarmalarynyń basshylary taǵaıyndaldy, jumys tıimdiliginiń naqty kórsetkishteri belgilenip, sportshylar men jattyqtyrýshylarǵa beriletin tólemder mólsheri biryńǵaı kórsetkishke keltirildi. Sonymen qatar sporttyń basym túrlerine qoıylatyn irikteý talaptary anyqtaldy.
Bıyl kúshine engen «Dene shynyqtyrý jáne sport týraly» zańnyń jańa redaktsııasy belsendi júzege asyrylyp jatyr. Atalǵan zań bıýdjet qarajatyn tıimdi paıdalanýǵa, sportty damytý úshin onyń basym túrlerin aıqyndaýǵa, kásipqoı klýbtarǵa tólenetin tólemderge lımıt engizýge baǵyttalǵan.
Mınıstr sheteldik týrısterdi tartý jáne zańnamalyq bazany jetildirý sharalary týraly da baıandady.
Prezıdent tapsyrmasy boıynsha Şýche-Býrabaı kýrorttyq aımaǵy men Mańǵystaýdy damytýdyń keshendi jospary ázirlendi. Almaty taý klasterin damytý jospary daıyndalyp jatyr. Sondaı-aq kýrortty óńirlerdi órkendetýge arnalǵan vedomstvoaralyq jol kartasy ázirlendi. Onda týrısterdiń qaýipsizdigin qamtamasyz etýge, sanıtarlyq jaǵdaıdyń standarttaryn kóterýge jáne kólik qoljetimdiligin arttyrýǵa erekshe kóńil bólingen.
Memleket basshysy mınıstrge birqatar mindet júktedi.
Atap aıtqanda, vertıkaldi basqarý júıesin engizýdi jalǵastyrý, fýtbol klýbtaryn jekeshelendirýdi jedeldetý qajet. Budan bólek, týrızm salasyndaǵy zańnamany odan ári jetildirý mańyzdy mindet retinde ataldy.
Aıta keteıik, Memleket basshysy Qazaqstan boks federatsııasynyń prezıdenti Shahmurat Mútálipti qabyldady.