Prezıdent Frantsııanyń birqatar bıznes ókilin qabyldady
Memleket basshysy qazaq-frantsýz bıznes forýmy aıasynda Frantsııanyń bıznes qurylymdarynyń basshylarymen kezdesti, dep habarlaıdy Kazinform Aqordaǵa silteme jasap.
Lactalis Group kompanııasynyń bas dırektory Emmanıýel Benemen áńgimelesý barysynda Memleket basshysy atalǵan kásiporyn Qazaqstan naryǵyna 20 jyl buryn kelgen alǵashqy frantsýz kompanııalarynyń biri ekenin atap ótti. Búginde bul kásiporynnyń birneshe zaýyty men sút fermalary elimizde tabysty jumys istep jatyr.
Qasym-Jomart Toqaevtyń aıtýynsha, azyq-túlik qaýipsizdiginiń jahandyq syn-qaterlerine baılanysty agroónerkásip jáne azyq-túlik ónimderin óndirý salalaryndaǵy yntymaqtastyqtyń mán-mańyzy artyp keledi. Osyǵan oraı Qazaqstan aýyl sharýashylyǵy ónimderin tereń óńdeý isine ınvestıtsııa tartýdy yntalandyrady.
Emmanıýel Bene qabyldaǵany úshin Memleket basshysyna alǵys aıtyp, Lactalis Group kompanııasynyń yntymaqtastyqty nyǵaıtý jáne Qazaqstanda jańa óndiris oryndaryn ashý josparymen bólisti.
Memleket basshysy Boehringer Ingelheim France kompanııasynyń prezıdenti Krıstıan Vaızendi qabyldady.
Kezdesý barysynda Qasym-Jomart Toqaev otandyq QazBioPharm holdıngi men Frantsııanyń Boehringer Ingelheim kompanııasy arasynda tehnologııalardy berý týraly qol jetkizilgen kelisimniń mańyzdylyǵyn atap ótti.
Bul Qazaqstanda aýsylǵa qarsy vaktsına óndirisin jolǵa qoıýǵa múmkindik beredi. Memleket basshysynyń aıtýynsha, veterınarııa salasyn damytý azyq-túlik qaýipsizdigin qamtamasyz etýde erekshe ról atqarady.
Qazaqstan Prezıdenti elimizde bıotehnologııa klasterin qurý jumystary belsendi júrgizilip jatqanyn jáne osy saladaǵy otandyq ǵylymı saraptama jasaý isin damytý úshin QazBioPharm ulttyq bıofarmatsevtıkalyq holdıngi qurylǵanyn aıtty.
Prezıdent Semmaris kompanııasynyń bas dırektory Stefan Laıanımen kezdesti.
Stefan Laıanı Qasym-Jomart Toqaevqa Almaty oblysynda aýyl sharýashylyǵy ónimderin óńdeıtin iri hab qurý jónindegi birlesken jobanyń iske asyrylýyna qatysty málimet berdi.
Nysan 2025 jyly paıdalanýǵa beriledi dep josparlanyp otyr. Qazirgi ýaqytta Qazaqstan ınvestıtsııasynyń jalpy kólemi – 150 mıllıon dollar.
Kompanııa óz tarapynan jobany júzege asyrýdyń bastapqy kezeńinde tehnologııalar men Frantsııanyń ozyq tájirıbesin transfert jasaıdy.
