Prezıdent farmatsevtıkalyq bıznestegi kartelderdi áshkereleýdi tapsyrdy
NUR-SULTAN. QazAqparat - Qasym-Jomart Toqaev koronavırýs indetiniń taralýyna qarsy is-qımyl sharalary jóninde keńeste dári-dármektermen qamtamasyz etý máselesine egjeı-tegjeıli toqtaldy, dep habarlaıdy QazAqparat Aqordaǵa silteme jasap.
Memleket basshysy medıtsınalyq uıymdardyń, dárihanalardyń ne satyp alǵanyn, jalpy biryńǵaı dıstrıbıýterdiń qoımalaryndaǵy dári-dármek qoryn anyqtaýdy talap etti.
Úkimet ákimderimen birlesip, bekitilgen emdeý normalary men hattamasyna sáıkes keletin dári-dármekter men medıtsınalyq buıymdardyń satyp alynýyn qamtamasyz etýi kerek.
– Meniń tapsyrmam boıynsha PTR synamalary men medıtsınalyq betperdelerdiń baǵasy tómendetildi. Mundaı oń bastamany halyq birden sezindi. Osyndaı jumystardy medıtsınalyq dári-dármekterge, eń aldymen, koronavırýsqa qarsy medıkamentterge qatysty júrgizý qajet. Básekelestikti qorǵaý jáne damytý agenttigine Memlekettik kiris komıtetimen birlesip, atalǵan máseleni qarastyrýdy tapsyramyn. Jalpy Agenttik dári-dármekter men medıtsınalyq buıymdardyń baǵasyn retteý isine at salysyp, farmatsevtıkalyq bıznestegi kartelderdi áshkereleýi kerek, – dedi Memleket basshysy.
